De truchas y llambrones

TABA YOU aburríu na mio casa. Llamóme el miu amigo Pascual. Convidábame a la so casa a comer una bona sopa de trucha. Diba ya munchu tiempu tras de él pa que me deprendiera a cocinala. Decíame siempres lu mesmu, nun tien ná, nun tien ná, pero hasta'l día esi diban dos años que lo decía y nunca había concretao. Cuando llegué, tenía un mandilón puestu. Unu de esos color vaca pinta. A un llau las fogazas duras, a otru'l tarru de pementón y sal, acullá un tríu truchas nel platu, el morteru y el barreñón. -Vaslu faer tu, que tienes pinta tener muncha fame. Enceta la fogaza y córtala en cachos no muy menudines y échalu pa ese pucheru. Alcuérdome muy bien cuandu la mía güela aprendióme a faelas. Yera un rapaz, prestábanme yá las cacías. El cocinase lu que uno come, siempres yía meyor que ser cumu'l Llambrón de la llumbre, que taba siempres pescudando algu y al descuidu los demás. -¿Qué yía esu'l Llambrión de la llumbre? -¿Nun conoces la hestoria? Pues mira que foi sonada. -Non. -Corta un pocu mas de pan, que nun importa que sobre. Además tienes cara d'esfamiau. Resulta que nel mio pueblu, Xetinu, los rapaces, sobre tou nel antruidu, metíanse nas casas y arramplaban cola comida que veían. Esu yera cosa normal, pero un día... -¿Qué pasó? -Yá tá bien de pan. Nel mio pueblu había un guaje que se llamaba Franciscu y llamában-i Chiscu. Taba fecho un folgacián y tenía mas fame que'l perru'l ferreru que tragaba falispas pa comer caliente. La sua familia yera pubrísima y taba fartucu de comer lu que apañucaba polas güertas. Aparte d'esfamiau, tenía fama de gayoleru... Echa a rematina aceite a la pota y pica unos cuantos ayos. Muy finos. No prendas la llumbre entovía. -Y que le pasaba al rapaz esi. -Acabó llamándose'l llambrón de la llumbre. Durante un añu enteru principiaba a faltai comida a la xente. Cambiaba de sitiu los pucheros. Llevaba las fabas de Tomasa pa casa'l ti Sixtu... (inicio del relato)