Sendeiros del Sil

V ivimos nun planeta onde la mitá de la vida existe nas solombras de la nueite. Por esta razón la nueite tien muita importancia nel mundu real pero, tamién, nel territoriu de la fábula ya de la representación simbólica de las cousas.

En principiu, asociamos la nueite a un aquel negativu, a una ausencia de vida. Reservamos el suenu pa la nueite, el nuesu cuerpu alita al chegar la claridá del día. Asociamos, entós, la nueite al silenciu, a la inactividá, a la inmovilidá. Hasta podía dicise que mentalmente xuntamos la idea de la nueite ya la noción de la muerte. Sicasí, las cousas son más complicadas: tamién la fiesta ya l-™entusiasmu dionisíacu bril.lan na chispa ya nel fulgor de la nueite. Sí, yía un tópicu buscar el paroxismu de la vida nos momentos de la escuridá más fonda.

Pero esti xacer xeneral ya universal de la nueite tien un acentu especial nos sendeiros, caminos ya vueltas del Sil. Asina, por exemplu, pa la xente del Sil los momentos de la nueite asócianse tamién con un animal míticu, emblema de la tierra ya suenu de los cazadores: el faisán, chamáu tamién urogallu. Namás na fordura de la nueite pierde-™l faisán la sua vixilancia ya conviértese nun amante indefensu, descuidáu, débil. Yía, namás, nesi momentu de confusión ya placer del animal cuando-™l cazador puede matar la pieza más valoratible.

Nel Sil, tamién pola nueite revive la maxa ya las bruxas farful.lan las palabras incomprensibles que despiertan los poderes terribles. Anque la l.luz artificial ya la vida urbana luchan contra la nueite, entovía el.la conserva nos nuesos territorios los momentos máxicos del misteriu de la vida. Ya de la muerte.