El placer

ROBERTO GONZÁLEZ-QUEVEDO

Diz Schopenhauer que la vida preséntase, primeramente, como una cousa pola que pelear: hai que «ganase la vida», hai que quitar la fame ya cualquier necesidá primaria. Pero en resolviéndose esta cuestión primaria, la vida conviértese, según esti autor, nuna carga: abúrrenos la vida, danos noxu. Ou seya que, depués de pelear pola vida, termina siendo ésta pa nós un pesu que tenemos que l.levar nel l.lombu.

Esti razonamientu yía bril.lante ya tien un aquel de verdá. Pero nun val porque tien trampa: olvida que tamién en nós, tamién na nuesa vida alita un principiu: el principiu del placer. Nel cuerpu, na mente, na frente, tenemos manantiales onde brota lo que presta, onde naz lo que nos fai felices. En nós mesmos ta la posibilidá de sentir l-™al.legría ya-™l placer de vivir. (El mesmu Schopenhauer alcontraba placer en frases paradóxicas ya pesimistas como la que comentamos).

Pero alcontrar el placer nun yía fácil: hai qu-™atopar el sendeiru que nos l.leve a él ya non perdese nas autovías de la tristura. Nesti branu los sendeiros del nuesu mundu tán más guapos que nunca ya despiertan en nós las sensaciones del placer ya-™l gustu pola vida, tan xunida siempre al augua. L-™outru día calechéi por un sendeiru, xunto al Sil, ya esti sendeiru l.levóume a una revuelta guapísima ya xabaz. Sentir el ruxrux del augua contra las penas, mochar las manos na sustancia infinita onde nacimos, imaxinar aquel.los momentos que pasanon un día los nuesos antepasaos: estas cousas despiertan la guapura de la vida como una esperiencia absoluta. Una sensación de placer intransitivu, definitivu, que xustifica la existencia.

Caminando debaxo de los pláganos ya viendo la nublina de los montes sentimos que la vida nos afalaga, porque nun yía una carga, sinón una posibilidá prestosa. Pero tamién yía verdá que queda una solombra nel sendeiru: saber qu-™un día nun sentiremos el mar, nun veremos la nublina, nun tocaremos el pláganu.