NEVADÍSIMA

Na nuesa l.lingua tenemos el vezu de formar los superlativos de los sustantivos tamién cona terminación «ísimu, ísima». Asina, si cai una nevada mui grande, podemos chamala una nevadona o, tamién, una «nevadísima».

Resulta que’l mes de febreiru chegóunos con una nevadísima de las gordas. Muitos pueblos quedanon incomunicaos ya la xente nun podía cuasi nin movese de casa, porque yera difícil faer la güelga.

los vehículos que diban buscando xente que rescatar quedaban muitas veces al.lá arriba quietos, asperando outros rescatadores que tamién tenían que pidir ayuda.

Total, que tamos teniendo un iviernu como tien que sere: fríu ya nieve a esgaya. Ya tal como diz el reflán, la cousa yía bien buena, porque «anu de nieves, anu de bienes».

Pero a estas alturas la xente yá ta más bien cansa de tanta nieve. La blancura ponse más bien parda ya escura. Ya lo que fuera una cousa prestosa termina siendo un inconveniente.

Pero agora pasan cousas nuevas: la nevadísima puede dexar un tsunami políticu. Porque antias yera cousa de los particulares defendese d’el.la, pero los tiempos cambian ya agora yía’l poder políticu, nas suas diversas formas, el que tien que cuidar del bienestar. Muertas las instituciones tradicionales, chega la hora na que queda namás l’individuu, solu, frente al estáu ya las suas crías. O seya que, anque pasamos menos fríu, la vida yía un poucu más fría.