San Xuan ya San Pedru

El molín del tiempu nun apara enxamás. El sou movimientu circular fai que l’universu xire ya xire ya nós vamos afitando la vida nesti ciclu infinitu. Los puntos d’esta circunferencia imparable son democráticamente iguales dende’l puntu de vista físicu, pero pa cada unu de nós tien cada instante un aquel especial. Los segundos nun son iguales: dalgunos quedan na nuesa memoria como l.lendones imposibles d’olvidar ya outros desapaecen nel furacu negru de la nada.

Unos instantes que pa la cultura humana son siempres referencia alcontrámoslos nos equinoccios ya nos solsticios. San Xuan ya San Pedru son las dúas manifestaciones básicas del solsticiu de branu. Las fiestas d’estos dous santos importantes reservóulas la Ilesia, al cristianizar el círculu del tiempu, pa una de las celebraciones más importantes?: la nueite más corta ya’l día más l.lagru.

San Xuan ya San Pedru celébranse’l al final del Mes de San Xuan (el santu da nome al mes), ou seya, unos días más tarde que’l momentu auténticu del solsticiu astronómicu. Pero entrambas fiestas son la celebración ritual del entamu del branu. Hasta’l sieglu XVI, cuando s’afitóu’l calandariu gregorianu, siguió l’enquivocu del calandariu romanu de contar que’l día 24 del Mes de San Xuan yía’l más l.largu del anu.

Porque tamién San Pedru significa solsticiu de branu. La preba tenémosla na guapísima fiesta de la “salga”, nel Altu Sil, onde l’augua ya la foguera, esencia del ritual niciáticu, semaban las brañas ya los pueblos d’aquel.los verdes val.les.