lucas de tuy

Si perguntamos por “Lucas de Tuy” ou si amiramos n’Internet pa “Lucas de Tuy” diránnos, seguramente, que yía una calle de L.león ou que venden un pisu bien baratu no centru de L.lión. Desgraciadamente, en L.lión nun se conoz la hestoria de L.lión nin a muitos de los sous pensadores. Pero antias de ser una provincia L.lión foi outra cousa.

Van muitos sieglos, cuando’l molín de la hestoria xiraba gracias al augua de la Edá Media, hubo un pensador l.lionés influyente chamáu Lucas de Tuy, porque al final de la sua vida yera obispu de Tuy. Na segunda mitá del sieglu XII nacíu Lucas de Tuy, que foi canónigu de San Isidoro ya escribíu una interesante obra filosófica titulada “De altera vita…” Nesti tratáu dedícase’l nuesu pensador a criticar a los herexes albixenses. Albi, l’antigua Albiga a ouriel.las del Tarn, foi la patria de los cátaros, maniqueos ya enemigos del materialismu dominante.

Van 779 anos, en 1236, Lucas de Tuy fixo la sua obra más famosa, la chamada “Chronicon mundi”. Nesti testu cuenta l’autor la hestoria de la humanidá dende los primeiros momentos de la creación hasta la época de la Reconquista. Esta hestoria tuvo muitu espardimientu internacional ya yía bien valoratible polas suas referencias l.literarias.

Pa mi yía más prestosa la sua obra primera, porque nel.la critica ya, al mesmu tiempu, describe los pensamientos d’unos averroístas l.leoneses a los que califica de cátaros.

Unos pensadores de muitísimu interés, que protagonizarán outru molín del tiempu.