La Vuelta

La muela del molín yía redonda. Muel ya muel ensin aparar. Ya’l tiempu yía como la muela del molín: circular, infinitu. Polo menos eso nos diz la idea de la vuelta eterna, la idea de que tou vuelve nuevamente. Tou sigue outra vuelta, igual que’l rodenu, que nun apara enxamás.

La creencia na vuelta eterna, ou seya, como suel dicise en castel.lanu, “el eterno retorno”, apaez nos promeiros momentos del pensamientu humanu. Yá en tiempos más recientes quixo Nietzsche recuperar esta visión del mundu ya del tiempu. A esti pensador alemán prestába-l.ly el poder que tenía la vuelta eterna p’arrincar de nós la culpa, el cálculu ya la privación de vivir.

Nietzsche murríu nel 1900, pero siete anos más tarde nacía’l rumanu Mircea Eliade, que fixu un estudiu interesante d’esta forma de ver las cousas (“Le mythe de l’éternel retour”). Un mitu: ou seya, una forma arquetípica de ver la realidá.

Sicasí, la verdá yía que la circularidá de la vuelta eterna nun cuadra mui bien cona nuesa forma de ver el mundu. El cristianismu dexóu una güelga mui fonda cona sua forma l.linial d’entender el tiempu ya la hestoria. Ya estas formas primixenias, que tán na raíz de la mente coleutiva, tardan muitu en cambiar. Podemos aveiranos a la poesía ya recuperar la vuelta eterna. Podemos reclamar el placer ya creer na repetición infinita. Podemos maxinar esi círculu interminable. Pero, si somos sinceiros, tenemos que reconocer que nun yía yá la forma nuesa de ver el mundu. L’angustia pol ruxrux de las vueltas del molín siguirá con nós muitu tiempu.