Andurinas

«Las andurinas na primavera, tierras calientes dexan apriesa», escribía Eva González al referise a estos simpáticos páxaros que barruntan que l’iviernu marchóu yá dafeitu. Con un vuelu rápidu que nos fai mover la cabeza pa siguir la sua caprichosa actividá, l’andurina yía un animal especialmente buenu, mui apreciáu popularmente.

De pequenos sentimos dicir que yera pecáu matar una andurina. Ya tamién que nun debíamos esfaer los sous niales. L’andurina sepresenta la bondá, l’animal amigu del home, el ser que más desanicia los insectos. Ya l’andurina foi siempres tamién el símbolu del pasu del tiempu, del imparable molín que fai alitar las cousas. Símbolu tamién especialmente de la renovación de la primavera, cuando la vida chega outra vuelta.

N’outras culturas distintas de la nuesa l’andurina representa la pureza ya la l.limpieza, porque enxamás s’empuerca: nun toca’l suelu, nun anda por sitios sucios. Asina, soltar una andurina que taba presa podía significar buscar un destinu feliz o la curación d’una desgracia.

Nas zonas cristianas dizse que fueran las andurinas las que sacanon de la cabeza de Xesús las espinas que tenía clavadas. Ya que cuando faía esti l.labor, una andurinina clavóuse la espina nel corazón. Por eso Dios castiga a los que perxudican a las andurinas. Ya en dalgunos sitios piénsase que si se manca a la golondrina entós el l.leite de las vacas estropéase ya sal con sangre. Tamién se pensaba que na casa del que yera malu conas andurinas las pitas menguaban na producción de güevos. Conclusión: sigamos defendiendo las andurinas ya cuidando los sous niales.