la batalla de las babias

Nun somos quien a vivire sin hestoria. Ya si nun la tenemos, inventámosla. Hasta hai personas ya, por supuestu, pueblos enteiros, que manipulan la sua hestoria en ficias de la sua voluntá de ser. Esto quier dicir que la hestoria pue ser positiva ou negativa, buena ou peligrosa. Depende.

Más al.lá de la manipulación, el molín del tiempu l.lévanos a una hestoria humilde, a un episodiu que güei cumple xustamente 1221 anos: el 18 de setiembre de 795 pasóu lo que dalgunos hestoriadores chaman «la batalla de las Babias».

Esi día de finales del branu acabóuse la voluntá de los reis musulmanes de castigar ya someter al reinu de los astures: los árabes marchanon de retirada pol puertu Ventana.

Nel 794 un exércitu árabe mandáu por Abd al-Malik atacóu la capital astur, pero cuando volvía ganador, resultóu muertu’l xefe militar nun ataque de los cristianos.

Al outru anu, en 795, Abd al-Karim, harmanu d’Abd al-Malik, buscóu outra vuelta l’ataque a los astures ya de pasu la venganza pola muerte del sou pariente. Abd al-Karim l.logróu ganar, pero fueran victorias pírricas, de manera que la «batalla de las Babias» significóu que marchóu pal sur ya nun volvíu: los cristianos del reinu quedanon l.libres de la invasión musulmana.

Fitándonos nestos l.lendones, gracias a estos puntos ya a aquel.los outros filos, vamos texendo la telaraña cona que buscamos sabere? qué somos ya qué queremos sere.