COUSAS DE XINEIRU

Esta semana que terminóu agora fuera la d’un santu importante: San Antón. San Antón foi siempres unu de los santos que más quixo la xente, porque yera la pequena divinidá que defendía los animales curándolos ya protexéndolos del mal. Nun hai dulda de que’l santu que cuida de los animales de casa yía siempres el santu más adoráu. Porque la casa afítase nos animales que la sostienen.

San Antón Abad vivíu no sieglu III. Nun hai que lu confundir con San Antón de Padua, que naciera diez sieglos más tarde ya yera orixinariu de Portugal. Esti San Antón de Padua tien la sua fiesta’l día 13 del mes de San Xuan.

Pero’l nuesu San Antón patrón de los animales celebróuse’l día 17 de xineiru ya suel representase con un gochín xunto a los sous pías. Una xabarila pidiera al santu que sanara a los sous raxones ciegos. Ya como’l santu los curóu, dende aquel.la los animales fuenon los sous amigos. No mieu pueblu la xente cuidaba en comuña «el gochín de San Antón» pa ofrecelu al santu nel sou día.

??Pasáu San Antón, el xelu del iviernu vien a nós entovía con más friura. La nieve va a anubrire los montes ya chegará hasta los praos. Igual hai que faere la güelga. L’augua va a faese como’l cristal. Pero yá crez el día. Cuasi sin danos cuenta, el molín del tiempu l.levarános outra vuelta al tiempu caliente.