SCARDANELLI

El molín del tiempu l.lévanos güei a 1770, porque mañana, l.lunes 20 de marzu, cumpliránse 247 anos del nacimientu de Friedrich Hölderlin, unu de los grandes escritores de siempres, autor de versos d’interminable guapura.

?Yeran tiempos d’esplendor cultural de la nación alemana, dividida ya probe económicamente daquel.la, pero chanteiru de grandes pensadores ya poetas que marcanon un momentu únicu. Desgraciadamente, Alemania precipitóuse más tarde polos sendeiros de la destrucción ya aquel.la patria de la l.libertá ya la creación terminó siendo nuna caricatura ridícula por demás.

Pero quédannos, ente outros, bril.lantes creadores de distinta clas: dende las l.luces ilustradas de Kant al romanticismu de Hölderlin, conocedor ya amigu de Hegel, de Schiller, Fichte, de Schelling. Aquel.la mirada entusiasmada a la Grecia clásica foi l’al.legría d’una apasionada ilusión romántica.

Pero queremos a Hölderlin más al.lá de la sua clasificación como románticu. Naide como él fuera quien a sentir palpitar la naturaleza: «Porque siempres en primavera, cuando despierta nel home’l primer amor ya l’alcordanza…»

Ya al últimu Hördenlin, enfermu ya l.loucu, al que firmaba «Humildemente, Scardanelli», a esi querémoslu sobremanera. La sonoridá de la poesía de la naturaleza continuaba nel sou corazón anque la mente yá dexara d’alitar. Nesos anos escuros Hölderlin viaxaba outra vuelta al puertu final de la poesía: regresar a la patria, al archipiélagu de la sabiduría. Dende’l sou cuartu sentíase correr l’augua del Neckar. La razón yá marchara, pero los versos siguían la inercia del ríu. Humildemente, Scardanelli.