La pequena diosa

El cristianismu foi quien a recuperar la sensibilidá que las creencias paganas tenían tocante a distintos tipos de divinidá femenina. Igual que nel pasáu 15 d’agostu celebránonse fiestas a esgaya dedicadas a la Virxen, anteayere, día 8 de setiembre, tamién hubo mui bien de cultos a esta figura fundamental en parte del cristianismu.

Hai muitos sitios que celebran el día 8 de setiembre. Por exemplu, Ponferrada, onde las fiestas de la Virxen de la Encina tienen muitu aquel. Son mui interesantes antropolóxicamente las l.liendas sobre l’orixe del cultu a la Virxen. Ya la que se refier a la Virxen de la Encina yía especialmente guapa. Diz esta tradición que no sieglu V un obispu traxo la imaxen esde Palestina hasta Ponferrada, pero que depués perdiérase. Alcontránonla los templarios al faer el castiel.lu: cortanon una encina ya dientro taba la imaxen de la mesma Virxen.

Nun hai Virxen que nun tenga l.lienda. Ya hai Vírxenes a esgaya con muita fuerza identitaria: a la yá mentada de la Encina, podemos axuntar outras de distintu xacer ya dimensión (Cuadonga n’Asturias, Guadalupe, Czestochowa en Polonia). De Guadalupe hai polo menos dúas vírxenes importantes: la d’Estremadura ya la de México. Sobre ésta l’antropólogu Eric R. Wolf fixo un xenial estudiu: los españoles l.levanon el cultu a esta Virxen pa tierras d’América, pero depués la pequena diosa nacional de los mexicanos ayudóu a éstos a independizase de los españoles. Porque nas creencias ya nos mitos la paradoxa nun falta enxamás.