La Fuecha

Diz un dichu popular: «Por outubre, la fuecha cubre». Ya asina yía, porque nesti mes las fuechas de los árboles baxan ya pónense debaxo de los nuesos pías.

De mui pequenos vimos las fuechas, anque nun sabíamos pa qué valían. Más tarde, estudiemos las fuechas nas outras fuechas –las de los l.libros- ya conocimos las teorías científicas sobre los vexetales. Ya la ciencia esplicóunos que las fuechas valen pa que respiren los árboles, pa que’l suelu se faiga más ricu. Las fuechas son, entós, mui importantes pal conocimientu, pa saber cómo yía realmente’l mundu en que vivimos.

You alcuérdome con emoción d’aquel día en? que’l mieu padre vieno a casa con unas piedras prietas, unos trozos de carbón onde taban petrificadas las fuechas de los feleitos. Aquel.los carbones de feleitu yeran como una monstruosidá máxica que depués los l.libros m’esplicanon dafeitu. Ya entós deprendí que, paez ser, los val.les onde you naciera yeran mui ricos, tenían un carbón onde un artista incomensurable dibuxaba las fuechas conos sous tallos, conos sous nervios ya cona sua superficie plana pa descender poucu a poucu al suelu. Agora estos val.les yá nun son ricos.

Mui importante lo que sabemos de las fuechas: las suas clasificaciones, el sou significáu pa informanos de cómo yera’l mundu. Sicasí, siento que perdí lo que más valía de las fuechas: el placer de tocalas, la sua forma inmediata ya sensible, la fantasía prístina de la naturaleza que siempres cambia ya que cada día vien diferente.