lussi

El martes que vien celébrase’l día de Santa L.lucía, un día significativu na rueda del ciclu anual. Yá n’outras ocasiones el Molín del Tiempu visitóu la celebración d’esta santa de Siracusa que fuera mártir no sieglu III. A el.la, según la l.leenda, quitánon-l.ly los güechos, pero nun perdíu la vista ya ta representada teniendo manu d’una bandexa con dous güechos. Por esto yía la patrona de los ciegos.

??El calendariu xulianu creyía que nesti día 13, día de Santa L.lucía, dábase’l solsticiu d’iviernu, o seya, entamaba’l crecimientu del día. D’aiquí vien el reflán: «Por Santa L.lucía menguan las nueites…»

Pero los raigaños de la creencia son mui fondos ya yá antias del Cristianismu celebrábase’l solsticiu d’iviernu con rituales ya creencias afitadas no símbolu de la l.luz ya la escuridá. Asina, nos países nórdicos cristianizóuse una divinidá maléfica, Lussi, que yera una mucher peligrosa, un demoniu femenín, una figura maléfica.

Na nueite más l.larga, Lussi podía secuestrar a los nenos qu’andaban fuera de casa, más que nada los qu’enredaran ya fixeran esbardagüertos aquel anu. Esti ser mitolóxicu podía hasta metese pola chimenea ya l.levar al nenu.

Yía interesante observar que precisamente nos países nórdicos yía onde más se conserva la celebración de Santa L.lucía, con mozas que l.levan l.luces qu’al.luman la nueite. Outru exemplu de cristianización de tradiciones más viechas: la diosa mala conviértese na esperanza de que chega la l.luz, la vida. De que vuelve a rixir el Sol.