pan

Seguramente yía fácil definir qué yía’l pan. Pero esta palabra, ‘pan’, despierta en mi dúas emociones fondas, mui afitadas na ?memoria. El primer pan que conocí nun yera’l d’agora. Yera’l centenu: un eiru de pan yera una tierra onde nacía la planta del probe ya escuru cereal que’l fornu l.levaba a la mesa.

Más tarde conocí nos l.libros el dious griegu que más me prestóu ya interesóu simpres: Pan, el dious del monte, de la naturaleza salvaxe, d’esi mundu que cuanto más conocemos más estrañu nos paez.

Seguramente por nacer en Palacios del Sil ya conocer los sous montes inmensos, los árboles infinitos ya’l reinu del osu, del faisán, del l.lobu ya de la raposa, siempres creyí en Pan. Peligrosu, vixilando a los pastores, xiplando antias de la borrasca, Pan sigue vivu: outros diouses marchanon pero él continúa nos mestedales. Un instante de soledá ente las brañas pue dexanos sentir la sua presencia.

Ya nun soi a olvidar a Knut Hamsun, l’escritor noruegu de l.lamentable biografía pero autor de testos sublimes. Murríu van 65 anos, tal día como güei, un 19 de febreiru. Escribiera no sou l.libru ‘Pan’ esta confesión: «Delantre de la mia cabana, al pía del sendeiru, había una piedra gris que terminóu siendo la mia amiga. Ya al marchar saludábame con tal simpatía que you sentía la emoción de separtame d’un amigu de verdá, un amigu qu’asperaba, cordial ya inmóvil, a que volviera a la mia cabana».