Pueblu ya ciudá

Unu de los mechores estudiosos de la sociedá campesina yía’l profesor Teodor Shanin, qu’atopóu un calificativu bien acertáu pa definir esta clas social: “incómoda”, los campesinos son repunantes pal poder, que xeneralmente yía urbanu. 

A los homes poderosos, esos que mandan nos palacios de dalguna ciudá, présta-l.lys imponer la sua forma de vida a los pueblos. El mundu rural yía dependiente, guarda a duras penas el saber d’una cultura milenaria, pero insegura, mientras el poder veilos con noxu. Yía verdá qu’a veces, cínicamente, la clas urbana dominante tien a los paisanos como símbolu identitariu ya los afalaga, pero en realidá sigue teniéndolos por xente de segunda clas. 

Esta clas incómoda pon cada ciertu tiempu de los nervios a los oficinistas de ciudá, que nun son quien a someter a los pueblos. Shanin ya outros sociólogos ya hestoriadores destacan esti caráuter incómodu del campesináu na vida económica ya política. Asina, anque la xente del mundu rural suel ser conformista, cuando se rebela nun hai quien la pare. Yá destacara’l molín del tiempu va unos meses la cabezonería del campesináu en cuantas a los aspeutos rituales de la vida. Pero esti espíritu testón, tozudu asoma tamién en muitos outros temas. Desconfiaos no tocante a lo que chega de la ciudá, nun aceutan muitas iniciativas de modernidá que vienen de los del mundu urbanu ya esto fai que puedan quedar, a veces, atrasaos en cuantas al progresu. Pero hai buenos estudios antropolóxicos onde puei vese que gracias a la sua resistencia muitos paisanos nun fracasanon al embarcase en proyeutos que, viniendo de la ciudá, engañaban ya l.levaban trampa.

Prestaría muitu que pueblu ya ciudá se complementaran de verdá. Pero

lo d’agora nun yía complementariedá, sinón asimetría: los pueblos menguan, nun tienen futuru, van morriendo mientras asusañan la vida urbana. El mundu rural yía delicáu, máncanlu con facilidá, ya yía dependiente. 

Muita xente de ciudá nun reconoz los valores positivos qu’axeitanon la recolección, la ganadería ya l’agricultura. Creen muitos urbanitas que los praos, las tierras, el monte, o seya, el paisaxe naz espontáneamente. Pero non, el paisaxe yía una realidá cultural, el paisaxe faenlu los seres humanos. El paisaxe yía tamién sonce, fráxil ya namás la xente de los pueblos yía quien a mantenelu. El mundu urbanu nun suel preocupase ya diseña la muerte de los pueblos. Pero cuando esta muerte se faiga realidá nun quedará alredor de la ciudá más qu’un mundu ermu, con matos ya monte ensin sendeiros. La ciudá será como una colonia penitenciara arrodeada d’un desiertu ensin vida denguna.