El recuentu

La nieve anunciaba la estación del inviernu. Yera que chegaba la muerte del anu. Una fuercia emburriábanos, entós, a faer el balance de 2019, la cuenta de cómo fueran pa nós los doce meses, con una riestra de cousas buenas ya outra de cousas negativas. Hasta nos anos malos alcontramos dalgún momentu que fuera prestosu, que nos diz que la vida merez la pena. Pero tamién habrá alcordanzas de lo que nos mancóu ya quitóu las ganas de vivire. El bien ya’l mal van siempres xuntos na esistencia ya en cualquier época los sentimientos acedos van al l.lau de los que nos al.legranon.

El final d’un fragmentu de tiempu siempres nos l.leva a faer la cuenta de lo que pasóu ya esta yía una acción racional, porque pa siguir al futuru yía imprescindible saber ónde tamos agora ya cómo van las cousas del presente. Pero, al mesmu tiempu, estos momentos de recuentu tienen un aspeutu máxicu ya quiméricu, porque la nuesa vida yía una realidá continua ya vivimos día tras día ya hora tras hora. El molín del tiempu trabacha infinitamente ya nun para enxamás: va siempres al mesmu son ya con igual velocidá. El día primeiru de xineiru seremos igual que lo fuéramos el día antias. Tendremos el mesmu cuerpu cuando venga l’anu 2020 ya tamién será igual la nuesa alma. Pero nun seremos quien a evitar una diferencia importante: viviremos n’outru anu.

El sol ya la bioloxía van partiendo los fragmentos del tiempu: una nueite, un día, un mes, un anu, una vida. Pero, más al.lá del sol ya de los organismos, vamos celebrando los finales d’esos fragmentos, porque tenemos qu’echar la cuenta cuando dalgu termina. Anque son muitos los recuentos que faemos mientras vivimos, you alcuérdome güei d’un recuentu bien especial que deprendimos na nuesa cultura.

Porque la nuesa cultura enseñóunos un recuentu mui emotivu: el que se fai nas nuesas casas cuando chega la muerte de dalguién de la familia. Xunto a la tristura pola desapaición del ser amáu hai una febril actividá ritual ya vienen siempres los pensamientos que buscan resumir, contabilizar lo que pasara. Ya más tarde, en terminando los rituales, la familia queda triste consigo mesma. Terminóu l’entierru ya, cuando yá marchanon vecinos ya amigos, el vacíu de la casa chénase del silenciu del ausente. Él quedóu solu, na friura de la tarde ya de la nueite. Ya faemos, xuntos, un recuentu. Mírase cuánta xente asistíu al tanatoriu ya al entierru, cuántas familias compartienon el duelu. Ya, en recontando la solidaridá de la xente, de los demás, en sabiendo cuánto querían al que yá nun ta con nós, una cierta calma quier faenos comprensible lo que nun entendemos.