Un dios pal mes de xineiru
Hai una colina o tesu en Roma que se chama «Janiculus» («Gianicolo» n’italianu). Nun yía unu de los siete tesos romanos que deprendiéramos na escuela, sinón outru que s’alcuentra na zona del Trastevere, un barriu mui guapu. Esti tesu, al que chaman tamién «la octava colina», debe’l sou nome a un dios romanu importante, al dios «Janus» («Jano en castel.lanu»). Esti dios, Janus, yera muitu buenu pa la xente, porque diera a los homes la intelixencia, la l.lingua, l’agricultura ya la navegación.
Janus entovía sigue con nós agora, nesti tiempu de friura, cuando vemos la primera fuecha del calendariu, porque’l mes primeiru del anu, xineiru, yera tamién el mes del dios Janus: «Januarius». Janus represéntase con dúas caras, yía un dios bifronte. A veces dicimos que dalguién tien dúas caras ya eso significa que yía una persona falsa, de la que nun podemos fianos. Pero esti dios l.latinu de doble cara nun yera asina porque fuera de pouca confianza: tenía dúas caras porque una d’el.las miraba pal pasáu ya outra miraba pal futuru.
Andamos yá pol mes de xineiru, el mes primeiru del anu, el mes onde planificamos cómo será la próxima vida nuesa. Pero tamién xineiru val pa mirar, un poucu de regüechu, pal pasáu, pal anu que terminara va poucu. La nuesa mirada va, entós, d’un l.lau pa outru. En xineiru tenemos dúas posiciones de la nuesa cara, somos bifrontes.
No calendariu agrícola de San Isidoro apaez el nome de Januarius na sua forma de l.latín vulgar: «Genuarius». De «Genuarius» vien el nuesu nome «Xineiru», mes del iviernu que val pa encetar el nuevu anu. Janus yía’l dios que tien la chave de las puertas, porque cada puerta yía’l pasu d’un espaciu a outru, d’un tiempu a outru. El mes primeiru yía’l que xune l’anu que pasóu con esi anu que vien nuevu. Nas figuras d’esti mes de xineiru apaez el dios Janus conas suas manos zarrando la puerta del anu que marchóu ya abriendo tamién la puerta del siguiente. Hai quien diz que, mientras nos outros meses apaecen figuraciones de los trabachos estacionales, en xineiru nada nos diz el calendariu de cómo son, con imáxenes, los l.labores de la casa campesina.
Pero nun yía asina. En primer l.lugar, xineiru yía un mes muitu fríu ya fuera de la casa ya de la cuadra faise poucu l.labor, pouca cousa. Outramiente, tamién yía un trabachu, tamién yía un l.labor importante que la casa piense cómo fuera l’anu pasáu pa tomar decisiones nesti anu nuevu. Porque p’acertare na vida tenemos que sabere trancare con xeitu la puerta de lo que marchóu ya entrare con intelixencia no cuartu del futuru. Esta yía la chave secreta de la nuesa felicidá.