La raposa humana

La raposa yía un animal emblemáticu en tola cultura europea ya esto veise na nuesa tradición oral. De Rusia a Portugal, la raposa yía un protagonista destacáu nos cuentos populares. La raposa entra nas casas ya garra las pitas. Outras veces disimula ya faise la muerta. Suel formar parexa con un l.lobu, pero enxamás yía fiel, asina que lu engaña. Ya nun se conforma con engañalu, sinón que se burl.la d’él con crueldá.

You tuvi la suerte d’escuitar de nenu, pola nueite, fábulas onde la raposa yera protagonista, pero guardo na memoria con especial aquel unu d’esos cuentos. Yía la hestoria que diz qu’una raposa, por ayudar a un home a l.librase del osu, pide al paisanu que la recompense con una pita ya los sous pitos. L’home, en vez de regalar la pol.larada, da a la raposa un sacu con perros. D’esta miente, los perros acaban saliendo del sacu ya l’amu embízcalos pa que la persigan pol monte. El.la cuerre muitu ya l.logra perdelos de vista, pero queda mui cansa ya, tirándose a la l.larga, dialoga conas suas patas ya conos sous güechos, agradeciendo lo que corrieran ya lo que vieran. Pero mira pal sou rabu con rabias ya ríñelu:

— ¡Ai mias patinas, cómo corristeis! ¡Ai mieus güechinos, cómo vistis! ¡Ya tu, rabu de Barrabás, you tiraba p’alantre ya tu tirabas p’atrás!

Ya tan rabiosa taba que díu un mordichón al sou rabu, rompiéndolu en dúas partes ya desangrándose. Esta hestoria atrápanos, como tolos cuentos populares, filtraos pola estética del pueblu. Pero a mi chamóume especialmente l’atención non pola guapura, sinón pol diálogu que la raposa entama cono sou propiu cuerpu. Los brazos, las piernas, los güechos son parte de la nuesa identidá, del nuesu «you»: ¿por qué la raposa s’enfada ya conversa conas patas, conos güechos ya cono rabu? ¿Por quéi?

Nesta escena la raposa mira pal sou cuerpu como si fuera un ser estrañu: el cuerpu propiu como una cousa distinta. Yía lo que la psicopatoloxía chama «despersonalización», ver los nuesos miembros como achenos a nós. Pero nun nos interesa aiquí la enfermedá de la despersonalización, sinón lo que diz una raposa de los nuesos montes conversando cono sou cuerpu. Persiguida pol home ya polos perros, el.la fai un balance final de la sua corredera pola vida. Reconcíliase con parte de sí mesma, pero arreniega d’outra parte del sou cuerpu, del rabu. Ya termina fragmentándose a sí mesma, porque yía difícil mantener l’equilibriu entre tantas cousas distintas qu’hai en nós. Una raposa «despersonalizada», pero, tamién, una raposa mui humana: hai momentos nos que cansamos del nuesu cuerpu ya quedamos quietos, ensin ganas de siguir.