Siguen con nós

El.las ya el.los siguen viviendo xunto a nós. Nun los vemos, yá nun tienen un cuerpu físicu, pero el.los ya el.las siguen al nuesu l.lau. El.los ya el.las son los que xustifican lo que somos. El.los siguen diciéndonos, en voz baxa, a qué xente queremos, a quién debemos dalgún favor. Dícennos quién yía de los nuesos ya quién yía un estrañu. El.las ya el.los son, de dalguna manera, aquel.los a los que tamos sustituyendo: el filu del que vien la nuesa vida, el manantial que nun termina ya tamién l’horizonte final al que va la nuesa vida. Igual son, quién sabe, el grupu d’amigos conos que disfrutaremos un día de los xuegos, de la risa, del dolor ya de l’al.legría. Un día en que tou sería definitivu, absolutu, ensin solombra nin defeutos. Un día interminable en que tou será un vasu chenu de realidá. Tou realidá dafeitu.

El pánicu pandémicu a la muerte nun nos dexa a dalgunos dir güei a visitalos. Nun podemos dir pa poner xunto a el.los una flor, una l.lágrima o una alcordanza. Nun caminaremos umbaxo las castañales del outuenu a la casa fantástica onde viven. A esi sitiu al que muitas veces fuimos de nenos, cuando nun entendíamos nada, cuando deprendíamos que na tierra alitaba la clave de la nuesa esistencia. Cuando nos educaban sentimentalmente pa reconocer ya aceutar que vivimos a la par de la espiga del centenu, que corremos pol tiempu del mesmu xeitu que las yerbas del campu.

Esti yía’l rasgu más humanu del ser humanu, la esencia que nos estrema de la bestia: saber que siguen con nós, porque un día los despidimos, porque un día primeiru del outuenu nos alcordamos d’el.los. Yía igual que dalgún neciu diga que nun val lo que faemos, que son inútiles los ritos que celebramos. El.los siguen con nós. Ya si compartimos el nuesu dolor individual conos outros, seremos quien a soportar mechor l’angustia incomprensible del adiós. Más símbolos, más ritos, pa reconcilianos cona esistencia ya faenos sabios, descubriendo que na celebración del ritual alcontraremos el significáu real de la vida.

De pequenu chamábame muitu l’atención ver dalgunos sitios ensin flores ya descuidaos, como los nenos a los que nun vien a buscar la familia cuando termina la clas de la mañana. Yera como si tuvieran solos. ¿Solos? Non, igual non. Porque anque un anu falte la flor, anque un día la materia impropia manche aquel espaciu, siempres dende l.luenxe chegarán memorias ya sentimientos. Porque la nuesa mente yía poderosa, la mente yía la que realmente fai la realidá. Porque nós siguimos tando xunto a el.los. Xuntos, cona sensación de tar a puntu d’entamar un diálogu ya d’imaxinar un cuentu.