Outuenu, Riga, Ganivet

Pasóu gran parte del outuenu ya la l.luz menguante diznos que nun anda l.luenxe l’iviernu. Esti mes qu’agora termina yía tiempu de magostar, axuntando a la xente pa outra celebración festiva. Porque castañas esti anu húbolas a esgaya ya de calidá muitu buena. Ya como agora hai osos a farta, dalgunas d’estas castañas pañánonlas los plantígrados, simpáticos ya peligrosos.

Pero como güei yía día 29, los pensamientos l.lévanme con tristura a tierras ya ríos del Bálticu. Porque tal día como güei, van 122 anos, alcontróu la muerte en Riga l’escritor Ángel Ganivet, que d’aquel.la yera cónsul na capital de Letonia. Yera l’anu 1898. Él vivía na parte oeste de la ciudá ya tolos días cruzaba’l ríu Daugava (Dviná en rusu) pa dir a la zona viecha. Un barcu pasaba d’una ouriel.la a outra ya l’escritor afogóuse nesi trayeutu, paez ser que buscando’l suicidiu.

Na riquísima l.literatura española, en cuantas al ensayu hai una obra especial de la que yía autor Ángel Ganivet: “Ideárium español”. Esti interesante escritu yía un testu apasionáu sobre la hestoria d’España ya la sua decadencia. Tamién sobre’l posible renacimientu de la que fuera una gran potencia. Xente como Ganivet, Unamuno ya Ortega y Gasset dexanon obras que fai falta l.leer si se quier entender la crisis española de finales del sieglu XIX ya la convulsión política qu’agora se vive.

Güei paeznos contradictoria ya inxenua la tesis de Ganivet, chena de puntos más idealistas de la cuenta, como la supuesta identidá senequista d’España ya la frustración de lo que pudiera ser una nueva Grecia. Da muitu que pensare la sua idea de que la espansión n’América fuera la causa de que’l país nun l.lograra la sua plenitú, de que se malgastara más al.lá del Atlánticu. “Idéarium español” yía una obra que tien aspeutos bril.lantes, anque tamién puen dar pía a malinterpretaciones peligrosas del presente.

Visitéi una vez Riga, pero nun yera pol tiempu triste del outuenu, sinón un día de calor bálticu. Había muita fiesta nas terrazas, la vitalidá del branu invitaba a l’al.legría ya tamién a disfrutar de las guapísimas plazas ya casas de sabor medieval. Crucéi’l ríu Daugava pola puente qu’agora xune las dúas ouriel.las ya visitéi el númaru 22 de la “Baluzo iela”, onde viviera Ganivet. Cuando volvía pal centru de la ciudá, al mirar pal augua, nun pensaba na crisis del 98 nin si fuera l’iviernu español, como dicen dalgunos, lo que provocara la sua depresión. Non, daquel.la pensaba namás nel momentu de dolor del escritor, imaxinaba aquel instante, aquel sufrimientu de baxar xunto a los trozos de xelu de las auguas frías del Daugava.