De cómo Santu Martinu manducaba un l.libru pa faese sabiu

El martes doce de xineiru cumpliéranse 818 anos de la muerte de Santu Martinu (1130-1203), que de mozu pelegrinóu por Europa. En volviendo, fixo un gran trabachu inteleutual no Monesteriu de San Isidoro, de manera que yía’l teólogu más importante del sieglu XII n’España.

Hai l.leendas a esgaya en cuantas a la sua vida. Que sanóu enfermos, que defendiera al Rei de los ataques de Castiel.la. Dizse que yera mui moderáu ya que namás bebía un gotín de vinu, con finalidá curativa. Dizse tamién que nun sitiu secretu de la Colexata hai una cuba que Santu Martinu fuera’l primeiru en chenar. Esta cuba ta guardada baxo tres chaves ya namás dalgunos miembros del Cabildu la prueban el día de Xueves Santu. Paez que yía’l vinu más viechu del mundu, pero nun hai dengún testimoniu qu’afite la realidá del ritual d’abrir la cuba, sacar un poucu ya chenala outra vuelta, porque naide diz nada.

Sicasí, el milagru más espectacular que tien que ver con Santu Martinu cuéntanoslu Lucas de Tuy, outru gran inteleutual medieval, na sua obra «L.libru de los Milagros de San Isidoro». Según cuenta Lucas de Tuy, una nueite na que Santu Martinu alcontraba dificultá pa resolver los problemas teolóxicos, apaecíu na sua alcoba’l mesmu San Isidoro diciendo:

— Traga esti l.libru pa que conozas la ciencia de las Sagradas Escrituras. You soi Isidoro, patronu d’esti sitiu, ya quiero que compartas la mia sabiduría pa enseñala a la outra xente.

Paez ser que Santu Martinu asustóuse ya nun quería comer el l.libru pa nun romper l’ayunu. Entós San Isidoru agarróulu pola barbadiel.la ya metíu-l.ly el l.libru a la fuerza na boca ya obligóulu a manducalu. En tragando aquel l.libru, Santu Martinu quedóu encesu ya pasóu a sere un gran teólogu ya rel.lucía pola sua intelixencia. De tolas conxeturas del conocimientu (las ideas innatas de Platón, l’al.lumamientu divinu de San Agustín, la sensibilidá del empirismu, etc.) denguna hipótesis yía tan espectacular como esta teoría dixestiva: dixestiva non metafóricamente, sinón orgánicamente.

Puei paecenos agora qu’esti milagru yía inreverente. Pero non: la esaxeración de comer un l.libru destaca l’aquel divinu del santu. La mitoloxía griega, modelu de guapura, tien episodios brutales. Préstanos escuitar los cuentos crueles de la tradición oral. Igualmente, las vidas de santos adornábanse con quimeras imposibles ya sangrientas, porque la creatividá de la nuesa mente enxamás descansa. Tamién na Edá Media, esa época de censura, la imaxinación humana burl.laba la vixilancia ya alcontraba rendixas pa fascinar a la xente con hestorias máxicas, terribles ya fabulosas.