La odisea definitiva
Anteayere día 19 cumplíanse trece anos de la muerte d’Arthur C. Clarke, autor de la gran obra «2001, una odisea del espaciu», na que s’afitóu la película del mesmu nome, dirixida por Stanley Kubrick. Clarke participara tamién como guionista nesta película de la que, en viéndola, tous guardamos dalguna alcordanza: el prisma inquietante, el monu rompegüesos, la computadora feita asesina, el misteriu de la razón.
Igual qu’Ulises buscaba volver a la sua casa, el viaxe al espaciu de Clarke miraba por alcontrar el nial orixinariu de la razón humana, onde los nuesos antepasaos tendrían entovía encesu’l l.lume prístinu de la intelixencia. Tenía razón esti escritor: yera una odisea. Anque tou yía una odisea: la trayeutoria de la nuesa vida, la hestoria de la familia, el devenir de lo que consideremos la nuesa patria. Por esto la obra d’Homero yía l’arquetipu l.literariu por escelencia.
Cuando, siendo you mui nuevu, buscaba hestorias de la xente, sentí muitas odiseas. Alcuérdome de la que me contara una viechina, tan viecha que creyía que los barcos yeran carros que cruzaban los mares. Alcordábase de Xe, aquel familiar que marchóu p’América ya del qu’enxamás supieran anuncia denguna. Xe perdiérase pa siempes na memoria familar. Asina me lo contaba el.la:
— ¡Ai, el nuesu Xe! ¡Qué sería d’él! You nun séi qué foi del nuesu Xe. Si’l carru valtaría, si s’afogaría nel augua... (Ya mientras pensaba que’l barcu valtara, el.la conas manos simulaba una cabriola nas olas).
Una odisea truncada, polo menos na alcordanza. Pero un viax que puei faenos pensare na odisea común de la nuesa especie. Porque agora que somos a conocer las claves de la materia ya las l.leis de la naturaleza, sabemos qu’esti planeta nuesu terminará un día ardiendo telúricamente.
El final queda l.luenxe ya nun lu entendemos, como pa los nenos yía incomprensible la edá terminal de los sous buelos. Pero sabemos que chegará esi día final ya por el.lo la humanidá va preparando la odisea cabera: el viaxe definitivu a outru mundu interestelar. Ail.lí guardaríamos la l.lámpara del pensamientu ya del espíritu, esa chamarada que cruzóu l’universu como un cometa únicu. Queremos que nun s’apague esta l.luz, pero’l periplu yía difícil: vamos ensin dioses ya diosas que nos protexan ya ensin seguranza nas nuesas creencias, qu’agora son yá fantasías relativas. Naide nos fairá saber que la cera val pa defendenos de los cantos de sirena. Nadie apartará los meteoritos que nos manden los Cíclopes. Ya, lo más penosu, igual el palaciu de Ítaca s’alcuentra ermu, igual Penélope yá nun texe ya nin siquiera quedan los pretendientes.