Freud en primavera

Nun día del mes d’abril, cuando terminaba’l sieglu XIX, Sigmund Freud sentíase cansu de la sua vida en Viena ya quixo salir al campu pa unas vacaciones. Pesaba muitu la fama de los sous métodos pa curar la neurosis. Dicíanse d’él cousas terribles. Criticábanlu pola sua teoría pansexual, en cuantas que buscaba esplicar la vida afitándose nuna supuesta personalidá perversa del ser humanu, que mancharía tolos actos d’homes ya mucheres.

Casárase en 1886 con Martha Bernays, nieta del rabinu principal d’Hamburgo, ciudá de la que disfrutaba paseando polos canales del puertu. Conocemos dalgunas cartas d’amor que Freud mandara a Martha. Nesa correspondencia veise la esquizofrenia del home de ciencia: al estudiar el mundu conviértelu nuna simple cousa, pero al vivir fai de la realidá pasión, sentimientu ya idealismu. «Tu sos —escribía Sigmund a la sua prometida— la esencia de l’al.legría de la mia vida».

Alcuérdome de l.leere a la ouriel.la del Ríu Sil una hestoria que Freud cuenta nas suas obras. Yera hora de marchar, pero non a Hamburgo, sinón a los l.lagos del Sur, al Tirol. Sigmund ya Martha descansaban nun hotelín familiar, onde tolos días servía la mesa una mocina roxa ya guapa. Esta moza aveiróuse un día a Freud pidiendo ayuda.

-Séi qu’usté yía médicu. Toi enferma de los nervios.

Ya contóu los sous síntomas neuróticos: sentía mui pesaos los güechos ya la frente, nun yera a respirar, paecía que tenía un gatu miagando na cabeza. Amás, de golpe metíase dientro d’el.la la l.lerza, el pánicu de que diba a morrer.

Freud, que viniera afuxendo del mundu del desarreglu mental, nun pudo negase a intentar curar a la moza. Martha aguantóu estoicamente las entrevistas del médicu cona enferma. Él, cono psicoanálisis, anque en plan informal, alcontróu la causa del mal: a la nena mancárala’l noxu que sintiera pol comportamientu inmoral d’un familiar con el.la mesma. Freud escribiera nos sous apuntes d’aquel.los días: «La mente inocente suel traumatizase al descubrir la brutalidá del despertar sexual».

Tolas nueites, cuando taba no cuartu con Martha, revivía Freud la paradoxa ya la contradicción de la sua esistencia. Por una parte, el mundu del amor que sentía yera una consecuencia de la fuercia obscena que bul.lía no remolín del inconsciente. Un banzáu tenebrosu que bien reconocía cuando entraba no desván ya no suétanu de las almas enfermas de la Viena burguesa. Pero, por outra parte, cuando él protagonizaba las caricias ya los beisos sobre la querida Martha, sentíase como un príncipe delantre del palaciu, como l’héroe d’un romance d’amor medieval. La vida yía complicada.