La Praga de Neruda
Güei, ventidós d’agostu, cúmplense xustamente 130 anos de la muerte del gran escritor checu Jan Neruda. El sou sitiu de nacencia fuera un barriu mui aquel de Praga, un barriu que se chama Malá Strana (‘Ciudá Pequena’). Escribiera Neruda unas cuantas obras de distintu xacer, pero’l sou l.libru más conocidu yía precisamente unu que tien por argumentu fundamental la vida diaria del barriu onde naciera: «Cuentos de Malá Strana».
Nestos cuentos de Jan Neruda veinse pasar personaxes con diferentes l.labores (xastres, ferreteiros, médicos, etc.) que van enfilando hestorias que, como en tola l.literatura prestosa, axuntan a la descripción d’un microcosmos conas suas carauterísticas particulares los aspeutos más emotivos ya universales de la xente en xeneral. El cuentu primeiru de la obra yía un relatu maxistral: «El señor Rysanek ya’l señor Schlegl». Entrambos viechos ódianse fondamente, de manera que tolos días se sientan nun mesón cerca unu del outru, pero enxamás conversan: cadagunu fai como que l’outru nun esiste. Un día, paez que las cousas cambian no mesón. Outra guapa narración yía l’alcordanza alredor d’un plan de revolución infantil escontra l’Imperiu Austrohúngaru, porque daquel.la Praga yera parte d’Austria. Nun falta un humor bien peculiar, como’l qu’alita na hestoria del Doctor Misántropu, que yía esu mesmu, un misántropu dafeitu al que lo que pasóu un día nun cementeriu cuasi lu salva de la sua popularidá negativa.
En Praga, el Puente de Carlos cruza el Moldava y lleva a Malá Strana, donde nació Jan Neruda. R. G.-QUEVEDO
Dende’l centru hestóricu de Praga ya cruzando’l ríu Moldava pol Puente de Carlos chégase al distritu de Malá Strana. Güei, como en tiempos de Jan Neruda, la zona ta chena de bares ya mesones, pero si antias yeran parroquianos los que pasaban ail.lí la sua vida, agora son turistas los que nun aparan d’alitare pola zona. Una avenida importante tien el nome del gran escritor ya chámase «Nerudova». Por ciertu, de Jan Neruda garróu’l sou nome l.literariu’l poeta chilenu Pablo Neruda, que se chamaba en realidá Ricardo Eliecer Neftalí Reyes.
Esplublizóu tamién Jan Neruda unos cuantos l.libros de poesía, ente los que destaca’l tituláu «Cantos cósmicos». Una obra orixinal, que busca’l significáu de la vida no universu, celebrando con optimismu la necesidá de conocimientu del home ya’l descubrimientu de los cuerpos celestes:
«Igual que flores d’urz,
el cielu ta semáu d’estrel.las,
que l.leva’l soplu del tiempu».
No telescopiu Hubble hai un exemplar de los «Cantares cósmicos» de Jan Neruda: l.leváralu un astronauta como símbolu de Praga ya de la voluntá de conocimientu. Porque a veces un pequenu mundu yía’l sendeiru mechor pa chegar al macrocosmos.