El teleféricu del padre
Nun m’alcuerdo de cómo sedría aquel día de Nueitebuena de 1962 en Palacios, porque you daquel.la yera mui nenu. Seguramente había un cielu gris ya dalguna raspa de nieve polos montes. Seguramente dalgún faloupu pensatible nun sabía si baxar o non a las casas. Pero nin los montes nin los faloupos nin la Navidá yeran conscientes de lo que pasaba polos boletines oficiales.
Yía verdá que nun m’alcuerdo de nada, pero si consulto agora’l BOE del 24.12.1962 l.leo que’l Ministeriu d’Industria “autoriza a Minas de Tormaleo S.A. la instalación del cable aéreo Pohling desde Villares de Abajo, San Antolín de Ibias (Oviedo) a Páramo del Sil (León), sobre el ferrocarril de Ponferrada a Villablino”. Asina entamóu la hestoria del Teleféricu que l.levóu muitísimos baldes de carbón de Tormaleo a Páramu, pasando por Peranzanes.
El teleféricu tenía 97 pilares, un túnel de 500 metros ya baxaba por Forniella hasta chegar al tren. Fuera una obra estraordinaria que dexóu de funcionare en 1998, cuando la metástasis de la crisis fixo que tou parara, fayendo asina que chegara la muerte de la economía de tola zona. Ya que la xente tuviera que marchar pa ser quien a sobrevivir.
Mieu padre trabachaba nesi teleféricu ya tolos días diba na Impala dende Palacios. Diba tamién muitos domingos, cuando había lo que chamaban “un cruce”. El cruce yera que cortaban la l.luz de tola zona ya ensayaban el funcionamientu de la obra. Con mieu padre tamién diba you dalgunos domingos, pa enseñame cómo yeran las operaciones. Él yera l’encargáu del famosu cruce, que controlaba cona sua mirada azulada. Nestas ocasiones él ya you díbamos con roupa de fiesta, paecía que fuéramos a una misa polos montes.
Outros domingos l.levábame a vere dalgunos pueblos d’aquel.los val.les. Alcuérdome qu’un día visitemos a un paisanu pa vere la sua corte. Yera espectacular. Había una vaca ya dalgunos xatos pensando en sabe Dious quéi, pero puestos encima d’un suelu negru como’l carbón, porque yera carbón. El pueblu taba puestu nun bloque d’antracita ya’l paisanu díume un cachu d’aquel cimientu prietu onde vivían. You nun aparaba de mirar aquel.la sustancia: yeran feleitos feitos carbón, que n’outra vida fueran verdes. Vere aquel.los feleitos prietos xunto a las feleitas verdes yera una enseñanza del pasu del tiempu.
Xente prestosa quier faer outra vuelta aquel teleféricu pa dar un futuru turísticu a los val.les abandonaos. Los políticos nun fairán casu dengunu. El.los yá fixenon lo necesario pa quitar l’antracita. Agora que yá nun hai botín, ¿qué necesidá tienen de complicase la vida? Outra enseñanza del pasu del tiempu.