La mucher de la nieve

La nieve apaez a esgaya nas distintas l.literaturas. Alcuéntrase na nuesa zona nas hestorias de xente que pasóu por momentos de peligru, anque en xeneral nun yía un tema frecuente nos cuentos tradicionales que fai’l pueblu. Sí apaez en cuentos de bobos, como na hestoria d’aquel rapaz que garróu una mozada de nieve ya quixo calentala na cocina.

Dalgunos cuentos de la nieve tienen que vere con matrimonios. Por Letonia ya Lituania cuéntase qu’un matrimoniu viechu que nun tenía fichos fixo un nenu de nieve: el nenu foi creciendo, pero un día al metese no monte tuvo que saltar una foguera ya, entós, esfíxose ya desapaecíu. Outramiente, diznos un cuentu medieval que la mucher d’un comerciante que pasaba muitu tiempu fuera de casa diera a l.luz un nenu ya cuando vieno l’home ésti pidiera esplicaciones. La mucher dixo que quedara embarazada un día al comer un poucu de nieve xelada. El comerciante fixo como que quedara conforme, pero, en creciendo’l nenu, l.levóulu un día de viaxe ya vendíulu. Al volver a casa dixo a la sua mucher que’l rapaz se disolviera nel augua al metese no mar.

Na cultura de Xapón sí hai muitos cuentos que tienen la nieve como protagonista. Afítanse estas narraciones nun mitu mui fondu na mentalidá xaponesa: el mitu de «Yuki-onna», «La mucher de la nieve» (‘onna’ yía ‘mucher’ en xaponés ya ‘yuki’ yía ‘nieve’). Yuki-onna yía una mucher guapa qu’apaez nas nueites de nevada, tan pálida ya trasparente que paez confundise cona mesma nieve. Yía una figura malvada, apaez de forma terrorífica delantre de la xente que se pierde na nevarada ya entra nas casas pa matar ya vampirizar. Detrás de la sua guapura anda, entós, la muerte: seduz a los homes ya, si se casa, suel terminar matando al sou home ya namás lu perdona cona condición de cumplir una promesa bien dura.

Esta figura sigue alitando na fantasía xaponesa ya anguano apaez muitu en Xapón nos dibuxos animaos (anime) ya nos cómics (manga), anque cada vez quier quitase más a Yuki-onna el caráuter de maldá absoluta ya agora tien dalgún aspeutu positivu. Alcontrámosla tamién na cinematografía xaponesa, como na película «Suenos», del gran Aquira Kurosawa, ya nas obras d’outros direutores como Kobayasi ou Tanaka.

N’Europa tenemos una obra maestra del danés Andersen: el cuentu l.literariu «La reina de las nieves». Pero la cultura xaponesa yía outru mundu. A mi esa mucher de la nieve paézseme a esas mozas que de pequenu sentí you qu’andaban al l.lau de l.lagunas ya pozos, non xunto a la nieve. Tamién el.las ponían condiciones ya tenían un aquel de peligru. Ya tamién detrás de la guapura guardaban la muerte.