La sirena ya outros seres seductores

Paezme que si la xente fai alcordanza de las aventuras d’Ulises na Odisea d’Homero, la hestoria que mechor se tien guardada na memoria yía la de las sirenas. Alcordámonos tamién seguramente del episodiu del Cíclope, al que l.logróu dexar ciegu l’astucia d’Ulises: aproveitando que taba yá quiloutru de bebere tantu vinu, l’héroe griegu espetóu una estaca no güechu d’aquel fenómenu ya asina foi quien a escapar de la cueva. Pero en comparanza cona hestoria de los xigantes de namás un güechu, l’aventura de las sirenas tien un aquel especial. El.las vivían nuna isla que nun sabemos cuála yía, anque nun falta quien diz que fuera pola zona de Capri ya Sorrento.

Estos seres fantásticos yeran mucheres pola parte d’arriba ya páxaros pola parte d’abaxu. Seducían a los marinos que pasaba no barcu cerca d’el.las, pero la sua seducción yera mortal, porque enxamás aquel.los homes volvían a ver a la sua familia. El cantar de las sirenas arrastraba a los marinos a la isla ya ail.lí morrían, por eso nos diz Homero que cerca d’el.las había un montón de güesos de las víctimas de la seducción amorosa. Las sirenas yeran seres qu’escondían embaxo de la guapura de la sua voz una voluntá asesina: prometían la felicidá ya en realidá daban la muerte.

Paez que fuera pola Edá Media cuando la sirena dexóu de sere páxaru pola parte d’abaxu ya convirtíuse en mitá mucher, mitá pescáu. Na representación pasóu a tener un aspeutu más prestosu ya amorosiegu cona cola chena d’escamas suxerentes. Asina apaez representada esta mucher fantástica nos capiteles medievales, como yía’l casu de la Ilesia de San Claudio de Zamora. Nesta guapísima figura de piedra la sirena acomoda cona sua manu esquierda la melena, mientras que cona dereita recueche la punta de la cola. Igual la forma de tocar la sua cola que la de colocar los deguechos son actos que simbolizan de forma bien clara la coquetería femenina.

Entovía pola costa astur cuerren guapas l.leendas de la Serena ou Sirena, que sigue la saga d’estos seres mitolóxicos. You, que soi d’un val.le d’agua non salada, nun sentí hestorias de sirenas, pero sí d’outros seres seductores como las ondinas, que viven onde hai l.lagunas ya pozos d’augua. La ondina yía bien diferente de la sirena, pero guarda tamién un aquel d’espíritu seductor ya una migachina de peligru. Podemos definir al ser humanu de muitas maneras: como ser racional, como ser que yía quien a rir, como ser intelixente, etc. Pero tamién como ser que cansa, que chega a aburrise de tou. Hasta cansaríamos de la guapura si buscala nun tuviera la semiente del riesgu ya la posibilidá de perdelo tou.