Los nomes l.literarios

Nestos días cúmplense 68 anos de la muerte de Concha Espina, qu’espublizóu en 1909 la obra «La niña de Luzmela», na que «Luzmela» yía’l nome l.literariu de la población cántabra de Mazcuerras. Va unos anos caminéi polos alredores del Saja, ya ail.lí atopéi esti pueblu, que tien agora dous nomes, porque l’ayuntamientu axuntóu al tradicional el l.literariu de «Luzmela», n’alcordanza de la escritora.

Anos más tarde, en 1914, víu la l.luz outra obra d’esta autora, «La esfinge maragata», que cuenta una hestoria dramatizada na Maragatería, ya onde Castrillo de los Polvazares conviértese en «Valdecruces». Yía una obra interesante, anque da una imaxe distorsionada de la vida tradicional maragata ya del rol de la mucher. Yera esta una tierra probe daquel.la, pero eso nun quier dicir que la xente de la Maragatería nun tuviera tamién una cultura propia con espaciu pa la felicidá ya pa l’al.legría diaria, pal humor ya pa una vida tan digna como la de cualquier persona capitalina. A veces los capitalinos calman la sua ansiedá compadeciendo a la xente de los pueblos, a la que pintan de negro pa engordar la sua autoestima, fantaseando con sere poderosos habitantes de ciudá. La obra tien un argumentu demasiáu usáu (el conflictu ente la visión tradicional del matrimoniu campesín, onde la familia tien que formar una empresa económica, ya la visión romántico-burguesa del matrimoniu idealizáu), pero pa mi yía una novela valoratible.

Yía frecuente usar nomes l.literarios como Luzmela o Valdecruces. Outru exemplu yía’l de Juan Benet, qu’en 1967 espublizóu «Volverás a Región», títulu que, según escribe un críticu l.literariu, «hace referencia a un territorio de la provincia leonesa». Hai estudiosos que faen al.labanzas de «Volverás a Región», pero a mi préstanme más las obras orixinales ya disfruto muitu conos testos del xenial William Faulkner.

Nun me gusta la novela de Juan Benet, que yera inxenieru de Caminos. Pero reconozo que sí m’interesa una hestoria que yía mui l.literaria: la del inxenieru que, mientras desterraba a miles de personas que vivían tranquilamente nas suas casas, sublimaba nos ratos l.libres esa barbarie con relatos sobre’l mundu «regional». En 1986 l’inxenieru volvía al l.lugar de la diáspora ya invocando a Caín insultaba a los que nun querían la violación de Riaño. Quéxanse dalgunos de que Benet nun recibiera grandes premios. Pero ¿nun yía honor abondu pa un inxenieru asina que’l banzadón del Porma se chame «Juan Benet»?

You tengo una dulda inteleutual: chamar «Embalse Juan Benet» a esi desastre ¿yía poner un nome l.literariu? ¿Cómo’l de «La niña de Luzmela»?