Los nomes de la vaca

Había un mundu chenu de felicidá. Yera cuando cada vaca tenía’l sou nome propiu. Una chamábase Garbosa, outra Mora, outra Artillera, outra Navarra. Amás del nome, cada una tenía los sous vezos, las suas manías ya la sua personalidá.

La vaca yera un trozu más de la familia ya tola xente de casa la quería. Hasta los paisanos más duros ya menos sentimentales tenían un aquel especial polas suas vacas ya si una se mancaba o morría o, por desgracia, había que vendela, yera fácil que resbalara dalguna l.lagrimuca pola cara. Cuando, cousa non mui frecuente, faía falta faer cecina, nun yeran los paisanos de la casa los que mataban la vaca, porque esos homes, anque poucu daos al sentimentalismu, nun yeran quien a quitar la vida de la vaca de casa. Encargábase, entós, dalgún outru de los vecinos de matar a la vaca querida.

Pa las outras casas la vaca yera una representación de la familia ya cuando la outra xente del pueblu afalagaba o cuidaba la nuesa vaca yera como si nos afalagaran o nos cuidaran a nós. Tamién, si dalguién ofendía a la nuesa vaca, convertíase darréu nun enemigu de nuesu.

Tous querían a la vaca, pero los nenos yeran los que tenían una relación sentimental más fuerte con el.la. Nun guapísimu cuentu de la escritora Eva González esplícanos l’autora cómo la sua vaca querida, la Galana, cuando sufría trabachando al l.labrar la tierra o tirando del carru, choraba con unos l.lagrimones bien grandes. El.la vía esas l.lágrimas, los demás seguramente non. Ya you alcuérdome bien de que, cuando en casa de mia bolica hubo que vendere la Mora, el disgustu fuera bien grande pa tous, pero especialmente pa los nenos de la casa. Perguntábamonos cómo la tratarían los nuevos dueños, si la Mora siguiría siendo feliz o non.

Pola mor de la especial relación de los nenos cona vaca, al dir pasando`l tiempu diban cambiando los sous nomes, que cheganon a veces a sere los de los protagonistas de los dibuxos animaos, héroes del mundu infantil. La fantasía de los nenos axuntaba las cousas del ayere conas del presente.

La vaca d’antias nun daba l.leite namás, yera tamién fuerza pal trasporte ya daba’l cuitu necesariu pa l’agricultura. Un estudiosu materialista esplicaría fácilmente la importancia sentimental de las vacas pola sua importancia económica na sociedá humana. Los aspeutos económicos ya los emocionales van más xuntos de lo que paez.

Anque son muitos los nomes que podían siguir teniendo las vacas, la realidá yía que van menguando estos guapos animales. Pero si un día faltan, igual yá nun podamos ver los praos ya’l paisax se convierta nun mundu salvaxe chenu de matos.