La vaca blanca que chegóu a Villafranca
El pueblu de Valdepráu ya la zona que tien alredor yía de lo más guapu que puei atopase. Alcontramos por ail.lí montes con árboles a esgaya (igual teixos que bedules ya xardones) ya con animales carismáticos como l’osu o’l dulce melandru.
En Valdepráu, pueblu que pertenez al concechu de Palacios del Sil, alcontróu tamién l´hestoriador ya etnógrafu Juan Uría Ríu, según escribiera nun artículu d’agostu de 1954, l’alcordanza de que los vaqueiros fueran los primeiros pobladores de la zona, alcordanza qu’entovía agora puei escuitase por tolos pueblos de la rodiada. Pero nun foi en Valdepráu, sinón na cercana L.laciana (no pueblu de Rioscuru) onde sintiera una historia que tien que vere con Valdepráu, concretamente cono Puertu de Valdepráu. En Rioscuru escuitóu Juan Uría al teitador Miguel García (de Fabero) contar la l.leenda de «la vaca blanca».
Según esta hestoria fantástica, los vaqueiros del Puertu de Valdepráu, ente los concechos de Degaña ya Palacios, sufrienon una época de muitu fríu ya nieve. Esta friura emburrióulos a marchar pal sur buscando un sitiu más caliente. Al entamar la marcha, los vaqueiros, según la tradición, axuntanon los sous ganaos, «al frente de los cuales pusieron una vaca blanca, exclamando:
Donde la vaca blanca
vaya a hacer su enfoscada
allí iremos nosotros
a hacer nuestra majada».
Chegóu la vaca a un sitiu ermu, un piornal, ya echóuse, fayendo ail.lí mesmu los vaqueiros las suas cabanas, que terminanon siendo la ciudá de Villafranca.
Diz Uría que nun se conoz en Villafranca esta hestoria de la vaca blanca, pero alcuentra outras narraciones míticas asemechadas, como aquel.la de la Antigua Grecia que cuenta qu’Ilos, fichu del rei de Dardania, ganóu en Frixia unos xuegos ya al ganar recibíu del rei como regalu una vaca mariel.la. Según l’oráculu, Ilos tenía que siguir la vaca hasta que parara ya s’echara. Ilos fíxolu asina ya onde la vaca s’echóu fundóu Ilión, o seya, la ciudá de Troya.
El pequenu mitu de los vaqueiros fundadores de Villafranca siguiendo la vaca blanca tien outru elementu interesante: la chegada d’un clima más fríu qu’emburria a la xente. En muitas tradiciones orales yía la friura la que fai que los pueblos marchen ya faigan la fundación de nuevas poblaciones. Mui cerca d’esta zona, en Torrestíu (concechu de Santu Michanu), sintíu Juan Uría la l.leenda de que los vaqueiros vivían antias de quietu en Torrestíu, pero vieno’l temporal ya la friura ya baxanon ya pousanon nas tierras baxas de la parte asturiana. Ya por eso agora pasan mediu anu abaxu ya outru mediu en Torrestíu.
Nun yía ciencia, son pequenos mitos. Pero prestan.