Masoch, el masoquista
Viena fuera de 1867 a 1918 la capital del Imperiu austro-húgaru, que foi un fracasu como estáu. Sicasí, la Viena capital austrohúgara yía un gran capítulu de la cultura europea: veise na l.larga filera de xente de sou, como Freud, Klimt, Zweig, Schönberg o Schrödinger, dalgunos d’el.los clientes del café Landtmann. Yía probable nel Landtmann dalgún día Freud comentara la sua teoría de que la mente humana tien la tendencia a revivire los momentos de sufrimientu, como nas obsesiones post-traumáticas, con un aquel masoquista.
Na punta oriental del Imperiu alcontrábase Leópolis, agora n’Ucrania. Esta fuera la ciudá de nacimientu de Leopold von Sacher-Masoch. Esti escritor escribíu l.libros a esgaya de la diversidá cultural del Imperiu, pero yía famosu más bien pola sua l.literatura alredor del tema del amor, especialmente en publicando la sua novela «La Venus de las pieles». Nesta obra hai dous personaxes centrales: Severin ya Wanda. Severín namórase de Wanda ya quier qu’el.la seya la sua ama ya él el sou esclavu p’asina cumplir las suas fantasías. Cuando Wanda lu maltrata de forma dominante ya cruel, él quier que Wanda tenga roupa de pieles ya más d’una xoya.
Paez que «La Venus de las pieles» yera una ficción afitada na propia vida personal de Sacher-Masoch, al que visitara una escritora mui nueva, Fanny von Pistor, pa pedir orientación na téunica l.literaria ya terminanon namorándose. En 1869 firmanon una especie de contratu eróticu onde Fanny tenía que chamase Wanda, vistise con pieles cuando lu castigara ya sere ama ya propietaria despótica de Leopold. Esti contratu valía pa seis meses ya afitaba que Leopold, baxo palabra d’honor, tenía «que sometese como esclavu a lu que la sua ama mandara, ensin dengún dereitu d’amante».
Los padres de Leopold axuntaran al nome de familia paterna (Sacher) el de la madre, una noble ucraniana chamada Charlotte von Masoch, pa que nun se perdiera. Ya efeutivamente nun se perdíu, sinón que quedóu inmortalizáu como símbolu del placer gracias a la sumisión ya a sufrir la violencia.
En 1886 el psiquiatra R. von Kraff-Ebing nun estudiu («Psychopathia sexualis») sobre lo que suel chamase ‘perversiones sexuales’ usóu’l términu «masoquista» pa referise a la xente que busca’l placer sufriendo agresiones d’outra persona. Esta etiqueta, inspirada na obra «La Venus de las pieles», tuvo ésitu abondu ya afitóuse pa referise a esti comportamientu no pasáu ya no presente. Sacher-Masoch murríu en 1895, asina que tuvo’l privilexu de saber, nos cabeiros nueve anos de la sua vida, que yera «un masoquista», por muitos motivos ya por antonomasia.