La gavanza

Na sua prestosa novela «Vendimiario», Menas Alonso cuenta que s’axuntaban unas cuantas mucheres pa comentar las cousas ya los l.labores del día. Esti autor, que naciera en La Bañeza en 1899 ya alcontróu la muerte bien nuevu (en 1931), diznos que las mucheres aquel.la tarde dedicábanse a contar hestorias tocantes a la bruxería ya a las curaciones. Comentaba una que’l fichu mancárase nun brazu ya nuna manu ya entós l.levóulu al bruxu pa que lu encanara ya qu’agora taba muitu mechor. Faíanse abondas al.labanzas del famosu bruxu de Seisón de la Vega, del que dicen que yera quien a curar males de distinta clas, como la tiricia ya hasta la histeria. Seisón yía un l.lugar asitiáu al pía del Órbigo ya’l sou nome tien interés etimolóxicu, porque yía posible que venga del l.latín ‘sessionem’ (asentamientu), igual pola mor d’una instalación militar romana.

Siguiendo cona bruxería, comenta l’autor la figura d’una «sabia» qu’apaeciera misteriosamente pola zona ya que, ensin cobrar nada, curaba a la xente de tolos males: a veces diagnosticaba namás mirando a los güechos del enfermu. El protagonista de la novela, que vive yá en Madrid ya amira con cariñu las costumes de la sua tierra natal, anque siente compasión pol sou atrasu, cuenta qu’un día la sabia fixo esti diagnósticu a un amigu:

—Tienes nel estoxu (‘estógamo’) tres l.lagartos ya dúas l.lagartesas qu’andan peleándose por una gavanza.

La gavanza, que tien gran poder simbólicu, yía la frutina colorada de la «rosa canina» ya de pequenu sentí dicire que yera venenosa. El casu yía que la sabia cada día que pasaba tenía más clientes. Ya venían a el.la, amás de los «inorantes», xente de la ciudá que pensaban que la sabia taba l.louca, pero, por si acasu, fiábanse más de la bruxa que de los doutores. Al final, l’ésitu tan grande de la sabia, a la que venía a consultare xente a esgaya, resultóu sere la sua perdición: l’alcalde alcordóu metela na cárcel.

Reproduzse asina una hestoria bien conocida esde la Edá Media. Hai un prexuiciu que diz que, cuando una mucher estracamundia l’orde social, yía porque tien poderes que nun puen venire más que de la fuercia del diañu. Ya’l resultáu yía la persecución, que na época d’esta novela yera dir a la cárcel, pero en sieglos pasaos podía sere queimare na foguera.

Gracias a escritores que disfrutanon describiendo cómo’l progresu diba desaniciando «las supersticiones», conocemos güei muitas culturas. Nun yía’l casu de Menas Alonso, pero, paradóxicamente, gracias a la pasión destructora de los teólogos del progresu conocemos agora aquel.las creyencias ya, tamién, la mente humana.