La música popular ya l’espíritu del pueblu

L ’etnomusicólogu Alan Lomax (Austin, 1915) recochíu folclor musical en países a esgaya. Pol outuenu de 1952 investigóu na Maragatería ya visitóu Castrillo de los Polvazares, Val de San Lorenzo ya Villalibre de Somoza. En recochendo materiales nesta zona maragata marchóu pa L.laciana, pal pueblu de L.lumaxu, onde tamién rexistróu bien de cantares antias de pasare p’Asturias.

La fundación burgalesa Lola Pérez Rivera acaba d’espublizare un gran l.libru («Alan Lomax en la provincia de León») onde se trascriben ya estudian las grabaciones que fixera daquel.la’l gran musicólogu. Nesta obra alcontramos cantares de ronda, de boda, bail.les, danzas ya romances. Yía en Val de San Lorenzo onde más material recochera Lomax, porque nesti pueblu l’etnomusicólogu pañóu temas populares de mui distinta clas. Amás de los cantares de ronda ya d’outros del ciclu vital, apaez el famosu romance de «La boda estorbada», nel qu’una recién casada busca al sou conde que marchara a las grandes guerras d’España ya Portugal. En chegando a onde él diba casase con outra, el conde reconoz a la sua mucher ya marcha con el.la, porque «los amores primeros son muy malos de olvidar». Esti guapu versu final sintiéralu you muitas veces de los l.labios de mia madre, anque el.la axuntaba esti romance al de «Gerineldo», outru mui famosu.

De los pañaos en Castrillo de los Polvazares chamóume especialmente l’atención «Al coger el trébole», con voz, flauta ya tambor. El famosu estribillu yía l’ecu de las celebraciones del ritual del soslticiu de branu, cuando pola nueite de San Xuan se busca la humedá ya’l verdor de las plantas en fidias de l.lograre más salú.

Hai cantares de ronda abondos en Villalibre de Somoza, nos qu’embaxo la ventana de la moza al.luma na nueite la cultura de los campesinos, los sous supuestos morales ya lo que significa sere una buena l.labradora, de la que se destaca la gracia pa recocher el granu.

Pa mi los más familiares son los que Lomax alcontróu en L.lumaxu, como’l cantar aquel de los l.lobos que baxanon pa L.laciana ya xubienon diciendo «tseite, tsume, tsinu, tsana», destacando asina’l fonema más identitariu de la zona. Ya chegánonme al alma estrofas de vaqueirada como aquel.las en que s’ofrez un queisu en señal de matrimoniu, que finalmente nun se fixo ya’l queisu tien que volvere pal hurriu.

En terminando de l.leere esta obra, penséi que los románticos tenían razón: na música popular adénsase l’espíritu del pueblu. Los sones son quien a faenos sentir, ver, goler ya saboriar igual el paisax de los campos horizontales que la esencia de las brañas ya los praos verticales.