La vida paralela d’Emilio Salgari

Un 21 d’agostu de 1862 nacíu na ciudá de Verona l’escritor Emilio Salgari, que fuera l’autor de mui bien de novelas d’aventuras, que tuvieran bien de difusión nos nuesos val.les. Nun cansaba d’escribire ya dexóu cerca de cien novelas escritas, ambientadas por tolos requexos del mundu. Una riestra d’el.las tien que vere cona parte de Malasia, como «Los tigres de Mompracem», onde l’héroe yía’l pirata Sandokán, un príncipe que taba en griesca escontra l’imperialismu británicu. Una serie de televisión fixo mui populares estas hestorias polos anos setenta.

Outras veces los sous piratas navegaban pol Caribe, como’l casu del Corsariu Negru, que repite un tópicu de la l.literatura de muitos héroes: namoróuse de la ficha del enemigu. Tampoucu faltanon los piratas que fixeran la sua hestoria pola zona de las Bermudas. Hasta dalguna novela de Salgari tien como escenariu l’Oeste americanu, con muita simpatía pola población qu’esterminaran los anglosaxones.

Anque las obras de Salgari nun tienen una calidá l.literaria estraordinaria, resultan muitu interesantes porque yeran parte de las novelas d’aventuras que contribuyenon a la educación sentimental de muitas xeneraciones de finales del sieglu XIX ya del sieglu XX. Esta educación sentimental afitábase muitu na tradición oral escuitada en calechos ya filandones, pero nas casas de los nuesos val.les, anque nun había l.libros abondos, sí había a disposición de la familia dalguna obra que se l.leía ya rel.leía, tatándose especialmente de novelas d’aventuras ya d’amor románticu. Precisamente porque yeran poucos los l.libros que se l.leían, yera tamién muita la sua influencia emocional na xente. Destacaba Borges que yeran probablemente estas obras d’aventureiros o d’ambientes namoradizos burgueses los que terminaban siendo «l.literatura popular», anque taban muitu l.luenxe de la realidá de la vida campesina ya ganadera. Había mecanismos de sublimación por paisaxes esóticos ya por riquísimos salones de bail.le que permitían a la xente tener el suenu de vivire en mundos distintos ya estraordinarios, conos que s’identificaban por demás, afuxendo de la sua triste vida cotidiana.

Tamién Salgari afuxía de la sua vida escribiendo. Insipirábase nas bibliotecas. Namás navegara unos días en barcu, pero presumía de ser capitán ya recibía a la xente con roupa de marineiru. Sublimaba cona sua doble vida d’héroe aventureiru ya cuando’l periodista Basioli lu acusóu de ser un farsante, cuasi lu mata nun duelu. La novela ya la l.literatura suelen valir pa imaxinar outra vida paralela. Asina lo fixenon ya lo faen l.lectores ya escritores, entrambos ya a esgaya.