Memoria d’un xuegu abandonáu

E l tiempu paez acelerase cada día más, muitu más. El mundu cambia, vienen outras ideas ya la xente fai cousas diferentes de las se faían. Esto veise en tolos aspeutos de la vida. El tiempu embúrrianos de continu ya arrástranos si queremos dexalu quietu.

Alcordábame you un día d’estos de cómo cambianon las cousas en cuantas al tiempu l.libre de nenas ya nenos, qu’agora tienen unos xuegos estremaos de los tradicionales. Nos xuegos d’antias había un espaciu físicu, un tiempu determináu ya una actividá real dafeitu, non virtual. Agora los nenos xuegan más bien electrónicamente: no sou móvil tán los sous xuegos ya los sous amigos. No sou móvil l.levan el.los el tesouru de la sua amistá.

Los xuegos tradicionales van perdiéndose. Yeran guapos ya tenían un encantu especial, porque yeran una creación del pueblu, anque la escuela funcionaba tamién como normalizadora ya difusora. Alcuérdome del patiu de la mia escuela de Palacios, onde xugábamos nel tiempu del recréu a la «Monta la mula». Un nenu fai de «mula»: dóblase ya queda agacháu mientras los outros van en filera saltando por encima ya poniéndo-l.ly las manos no l.lombu. Saltan dieciséis veces ya cada vez que saltan dicen una fórmula ya faen dalguna aición o axagüeiru. You xuguéi cantando ya diciendo estas fórmulas:

A la una monta la mula

A las dos el couz (dan un taconazu)

A las tres outra vez (repítese lo d’antias)

A las cuatro brinco ya salto (brincan antias de saltar)

A las cinco salto ya brinco (brincan en saltando)

A las seis la culada

Ya asina sucesivamente hasta chegar al saltu dieciséis, cuando se diz:

A las dieciséis la carrera’l galgu.

Ya entós echábamos a correr darréu siguiendo la rueda. Yera bien guapa la cadena de nenos saltando ya doblándose, anque podía sere peligrosu si’l que faía de mula s’agachaba cuando saltaban los outros ya éstos podían cayer ya mancase. El que fai eso cuando ta de mula tien mala intención, o seya yía o tien mala burra.

Esti xuegu tenía muitos aspeutos positivos: aguzar la mente ya la coordinación del cuerpu ya las palabras, prohibir la trampa, dar fuercia a la memoria, competir cono outros nenos, etc. Yera propiu de distintas zonas ya muita xente será quien a alcordase, anque las fórmulas cambiaban d’un sitiu pa outru.

Outramiente, nun podemos dicire qu’estos xuentos antiguos yeran mechores nin peores que los d’agora: yeran distintos. Igual los d’antias que los d’agora yeran coherentes cona realidá social, económica ya ideolóxica de la época. Vendrán outros xuegos que fairán que los d’agora seyan una viecha alcordanza, melancólica ya pasada de moda. Tradicionales.