Matai al pechulata

G anemus tantes batalles contra les fuerces invasores, ho, ¿y pa qué?... ¡los romanus han vueltu!, jefe, vilos yo l’otru día con sus armaúres, sus cascus y sus espaes ahí, junto a Porta Castiellu, n’un casón que les han montau esos traidores de la cidade pa glorificales, ho, p’adorailes y pa faceiles altarines con vitrines ya todus los restus rotus que dejaron praquí despois de estrapayare y masacrare a los nuesos güelus astures y a la su cultura y llingua, cagon su putu mantu, jefe, que nun ye buena señal, seguru que esi casón dará en ser el cuartel xeral de los nuevus legionarius, vienen de avanzaílle traíus pol l’alcaile y la cunceyala pa engañare al turismu, jefe, y van dejase ver pa que en cuanti llegui’l bultu enteru de su soldadesca nun venga naide a sosprendese, esu ye, son les fuerces exploraores vestíus de cómicus que manda Roma pa espianos les defenses y les muralles, cagon to les pites coloraes, como si me lo oliera, jefe, que mañana vién pacá la legión entera y el Berlusconi de pretor, que pa esu ye el amu de dos teles ibéricas que ya compró en su día p’allanare el campu, mmmmm, hueli mal estu, y no vea usté cómo’i les brille el pechu de lata de sus armaúres y lus penachus y el escudu repintau de colorau pa decinos que ye sangre’l enemigu, puta soberbia imperial, y si a esus legionarius-cómicus les ha invitau el untamientu, muitu peore, tán traicionandu al su pueblu asturiu, véndennos, ábrenles les puertes de Lleoun, bájense les bragues y páguenles además sus denarius pa que fagan gracies bobes a lus forasterus, ¡ye mentira!, tán aquí pa humillanus, tán pa medinus l’ataú y reconquistanus de nuevu antes de facelu les hordes mores del islamismu malditu que tamén s’apunta a robanus la paz y la hijuela, cagonrós, jefe, apele al patriotismu asturiu y primigeniu, espurrie la memorie histórique dormía de esti pueblu pasmau, levantamientu nacional al gritu de ¡viva Viriatu y la madre que nus parió!, tire de orgullu, hosties, deles una lección a esus legionarius espíes... y ya que es usté el alcaile d’esti lugar de Mostolillo, faga como’l de Móstoles y pida sublevación n’un bandu que diga: Lleounés, solidaridá: matai un pechulata... fora l’invasor .