Versos que venían de Provenza

E l Reinu de L.lión chegóu a sere en tiempos pasaos una realidá política bien importante: un estáu européu poderosu, una potencia económica ya militar. Por esta razón nos sieglos XII ya XIII los trovadores occitanos, que visitaban las cortes importantes d’Europa, vinienon tamién a L.lión conos sous versos d’amor cortés.

Hai muitos poemas occitanos dedicaos a los Reis de L.lión. Los trovadores tuvieran especial debilidá por Alfonso VII, coronáu como Emperador na Catedral de L.lión en mayu de 1135. Buscando la solombra del emperador, el trovador Marcabrú chegóu a L.lión con muitas esperanzas puestas nel rei, anque pouco a pouco paez que foi distanciándose d’Alfonso VII porque ésti nun-l.ly faía casu dengunu. De nada valíu que Marcabrú pidiera ayuda a la Emperatriz, pa la qu’escribíu estos versos: Empeiriz, pregaz per mei, qu’eu farai vostre prez richir (Emperatriz, ruega por mi, que you fairéi crecer la vuesa fama).

Entamando yá’l sieglu XIII, outru importante trovador, Peire Vidal, al.lababa a Alfonso IX, poniendo al rei de Leo como exemplu de donar (de dar, regalar). Yía interesante que los trovadores destacaban la xenerosidá de los reis l.lioneses. Tamién Guillem Magret al.lababa al Reinu de L.lión, onde diz qu’hai una fuente máxica que pon al.legres a los tristes ya fai rica a la xente probe (Et a Leon trobiei fon … en tornon alegr’e ioios … paubre manent).

Outru trovador, Elías Cairel, dedicóu tamién versos a Alfonso IX, quien, según él, disfruta de l’al.legría ya de la cortesía ya por el.lo mesmo esti trovador diz que vuelve los sous güechos al rei de L.lión (Al rei prezant de Leon sui viratz).

La poesía occitana yía un capítulu de los más guapos de la hestoria estética del mundu occidental. Ya concretamente esa parte d’Occitania que yía la Provenza paez guardar entovía nas suas flores, nos sous xardines ya nas suas vil.las aquel esplendor cultural.

Van unos ventiséis sieglos que los barcos de la Focea griega cheganon a lo que güei yía’l Puertu Viechu de Marsella, la capital provenzal. Dende aquel momentu outros pueblos fuenon axeitando la personalidá de Provenza, especialmente los romanos, que fixenon d’el.la la «sua provincia». La l.lingua ya l.literatura provenzales bril.lanon outra vuelta nel sieglu XIX, pero foi na época de los trovadores medievales cuando Provenza, con toda Occitania, axeitara una parte esencial de la espresión del amor ya de la poesía. Presta saber qu’esi mundu occitanu ya provenzal, que vive entovía con intensidá na nuesa educación sentimental, alitara tamién naquel reinu poderosu de L.lión. Un reinu traicionáu, pero magníficu.