Territorios imaxinarios

L os caleidoscopios son xuguetes mui usaos dende’l sieglu XIX. Prestan muitu a los nenos ya tamién a los adultos, porque, amás de formar guapas figuras, enseñan que las cousas puen ser diferentes.

A lo l.largo de la hestoria vivimos en tierras que van mudando como nun caleidoscopiu: un xuegu de formas qu’enxamás termina. Si vamos a los nuesos territorios, vemos, por exemplu, que dende l’Alta Edá Media hubo un ayuntamientu que’abarcaba territorios del ríu Sil (Salientes, Valseco ya Salentinos), del ríu Oumaña ya de Babia. Chamábase esti concechu “Travesales” ya la verdá yía que yera transversal. Pero aquel.las fronteras esbarrumbánonse al entamar el sieglu XVI, porque Travesales terminóu desaniciándose, apaeciendo la entidá de “Cilleros”, qu’axunta tamién transversalmente tierras de distintas cuencas, como pue vese na mui interesante obra del hestoriador García Cañón. D’esti concechu queda namás un resclavu o traza: el nome de Penalba/Peñalba de los Cilleros, güei parte del ayuntamientu babianu de Cabril.lanes. Pueblu guapísimu, gobernáu por una gran pena alba, blanca.

Estos cambios de frontera alministrativa son lóxicos pal alma del hestoriador, qu’esplica estos cambalaches pol xuegu de la política, la demografía ya la economía. Pero tamién l’alcordanza d’aquel.los viechos concechos trainos a la mente pantasmas del pasáu, espectros incomprensibles, como cuando vemos los pueblos abandonaos cubiertos de mofu. La nuesa fantasía proyeuta los temores ya deseos al futuru, pero los espectros de la memoria coleutiva xeneran en nós la fantasía del pasáu. Ya’l tiempu viechu, antiguu, tamién yía una construcción de la fantasía, porque ensin la fantasía la razón nun sería quien a xuntar ya a relacionar los datos de los documentos, las piedras ya’l códigu xenéticu.

??Los territorios que conocemos tienen dous portiel.los. Unu l.lévanos a disfrutar de la guapura de la tierra asina dibuxada: somos entós felices ya tamos satisfeitos del mundu. Pero outru, cuando cansamos del presente, diznos que nos prestarían territorios diferentes: mover el caleidoscopiu ya qu’apaecieran outros dameros de montes ya ríos. Ya, en realidá, tenemos esa posibilidá que nos fai l.libres: pensar ya imaxinar. En nós hai un caleidoscopiu que, dexando de l.lau la política, permite imaxinar cómo podían ser outros pueblos, outros sendeiros, outras xunturas. Imaxinar solos, ensin el ruxrux coleutivu, outros nomes, más guapos ya más prestosos. Seguramente esa figura nuesa enxamás será real. Pero tampouco’l paisaxe que tenemos delantre agora sobrevivirá al caleidoscopiu implacable del molín del tiempu.