El 'souvenir' de Mistral

Un 25 de marzu terminóu la vida de Frédéric Mistral. Asina, cúmplense mañana l.lunes cientu ya cuatro anos de la muerte d’esti escritor francés, que ganóu’l premiu Nobel, xunto a Echegaray, nel anu 1904. Chama l’atención el feitu de que ganara esi premiu universal siendo escritor en provenzal, una l.lingua minoritaria. Escribíu muitas obras, pero la más famosa yía Mireio, que resultóu mui l.leída tamién fuera de Francia.

Mistral foi unu de los fundadores del “Félibrige”, un movimientu pa defender ya faer alitar al provenzal ya, más tarde, a tol occitanu en xeneral. L’autoridá más importante del Félibrige yía’l “capoulié”, al que elixen los “mayorales”, que vienen a sere los académicos de la l.lingua provenzal. El Félibrige tien tamién más de cincuenta miembros estranxeiros asociaos ya you soi unu d’el.los, porque a mi nománonme l’anu pasáu. Comprometíme a defender al Félibrige ya fáigolu agora echando más augua al molín del tiempu.

Daquel.la muitos escritores almiranon la obra de Mistral. Asina lo fixo, por exemplu, no solsticiu de 189l el pensador Renan, que nuna fiesta en Ceaux, París, ponía’l trabachu del Félibrige como un exemplu del poder de la memoria: Cada unu de nós val según l’al.legría del principiu de la vida, porque la primera l.lingua, los cantares, los xuegos primeiros faen que la nuesa tierra seya la madre a la que volvemos. Los recuerdos, las alcordanzas, las recordanzas son la nuesa esencia. ¡Malheur à qui n’a pas de souvenir! (¡Probe aquel que nun tien memoria!), dixo Renan.

Tous tenemos en casa dalgún “souvenir”, voz francesa qu’usamos pa referinos a las cousas que guardamos como alcordanza de los nuesos viaxes turísticos. Nos estantes de la nuesa casa podemos tener estas cousas, souvenires, que son una guía de los nuesos periplos. Pero orixinariamente “souvenir” yía lo que permanez en nós al dir pasando pol sendeiru de la vida. Del l.latín “subvenire”, refierse a lo que vien con nós nel viaxe pola esistencia. Esas alcordanzas son lo más valoratible que tenemos, porque ensin el.las nun somos nada. Ya entre tolas recordanzas ya recuerdos, aquel.los de los primeiros tiempos quedanon especialmente grabaos na nuesa mente.

Yía una paradoxa de la nuesa memoria que, según va pasando’l tiempu, las alcordanzas últimas son las que primeiro perdemos. Pero las más primitivas, las que de cuando de nenos escuitábamos a la madre, las de los cantares, las de las fórmulas de los xuegos infantiles, éstas son las que van con nós hasta la meta. Esos son los últimos souvenires que quedan nos estantes de la nuesa mente. Son la realidá final de nós mesmos.