El mechor sabor del mundu

E l mechor sabor del mundu? Yía una cousa relativa. Nun hai aiquí una verdá absoluta, porque los sabores ya los gustos son suxetivos dafeitu. Pa gustos fixénonse los sabores, que dependen de la cultura, de la personalidá, hasta de las papilas. Pero sí yía verdá que, en cuantas individuos, podemos tenere un sabor como’l mechor del mundu.

Los mechores sabores son aquel.los que daba la comida cotidiana de la xente humilde. La bullabesa, la caldereta de pescáu, por exemplu, yeran platos pal sustentu diariu de la xente que trabachaba muitu ya necesitaba comida fuerte ya sabrosa. You guardo una alcordanza especial del caldu de berzas, aquel que taba a disposición de la familia ya que ganaba sabor d’un día pa outru. Siempres será pa mi’l caldu de berzas el que da’l segundu mechor sabor del mundu. Porque había outru que daba’l primeiru: el butiel.lu o botiel.lu.

El butiel.lu, agora mui chamáu ‘botillo’, yía un tesouru propiu d’una zona bien amplia, anque actualmente convirtíuse en marca cuasi identitaria berciana ya como tal yía conocidu hasta internacionalmente. Podrá dicise del butiel.lu que yía fuerte pa la salú o que pon a preba la capacidá pa faer la dixestión, pero naide puei dicire que nun yía un platu esquisitu.

El caldu yera de tolos días, pero’l butiel.lu reservábase pa las grandes fiestas. Especialmente pal Antroidu o Antruechu, igual la celebración más importante del anu en tiempos pasaos. Pol Antroidu rompíanse las convenciones ya manducábase a farta. La familia comía aquel.los poucos butiel.los que guardara con muitu cuidáu a lo l.largo del anu. Agora nun entendemos estas cousas, porque tenemos comida abonda tolos días, pero nun fuera asina siempres: la fame nun se quitaba dafeitu más qu’en dalgunos momentos festivos.

El butiel.lu paez que yía un alimentu con muita antigüedá. Concentra sieglos de cultura ya de tradición, porque un sabor tan fantásticu nun puei salir por xeneración espontánea moderna. La mesma palabra yía mui viecha: vien del términu l.latinu ‘butelus’, que deriva de ‘botulus’, o seya, embutidu, productu del gochu que se mete nuna tripa.

Chamóume siempres l’atención que Séneca, el filósofu que quería ser feliz gracias a la serenidá, diz na sua Carta 56 que si tenemos la paz na nuesa alma nun van a molestanos las voces del ‘botularius’ (el que fai l’embutidu) cuando pregona la sua mercancía. El ‘botularius’ romanu debía ser muitu escandalosu, pero paezme qu’a mi nun me mancarían las suas voces. Al revés: chenaría d’entusiasmu la mia alma ya, tamién, pondría al.legría a esgaya no mieu cuerpu cona esperanza del sabor mechor del mundu.