La sangre del Grial

Mui cerca d’Edimburgo alcuéntrase un pueblu chamáu Roslin, que pola mor del l.libru ya la película El códigu Da Vinci tien agora visitantes a esgaya pa ver ail.lí una ilesina onde, diz la tradición, los templarios guardaran el Santu Grial. Esta ilesia yía un paraísu de símbolos, porque tolas gárgolas ya figuras tán chenas d’alusiones enigmáticas.

Nun yía Roslin l’únicu sitiu que tien que vere cono Santu Grial, la copa de Xesús na Última Cena. En Xénova dicen que la «cattedrale» guarda’l Santo Catino, el Grial que truxeran na primera cruzada. En Valencia dizse que l’auténticu Grial chegóu hasta la sua catedral, onde s’alcuentra agora. Tamién en Gales, Inglaterra ya Irlanda hai creyencias asemechadas.

Nel anu 2014 esplublizóuse un l.libru bien valoratible (Los Reyes del Grial, de M. Torres ya J. M. Ortega), onde se documenta que’l Grial fuera’l regalu d’un califa exipciu al emir de la taifa de Denia, que terminóu dándolu al rei de L.lión Fernando I el Grande. Asina, según estos autores, el cáliz de Doña Urraca, que s’alcuentra na «Real Basílica de San Isidoro», yía l’auténticu Santu Grial. La documentación yía buena, pero’l problema son los muitos sieglos que siguienon al momentu de la muerte de Xesús, cuando los discípulos axeitanon el mitu más poderosu de la hestoria. Yía grandísima la incertidume ya you, entós, asusañando’l proverbiu l.latinu, diría que «in dubio pro proximo»: de quedame con dalgunu, quedaría cono Grial de nuesu, el cercanu.

La palabra ‘Grial’ vien seguramente del l.latín ya etimolóxicamente significa dalgo asina como ‘escudiel.la», porque’l Santu Grial nun sería namás la copa de Xesús, sinón tamién la taza onde se guardóu la sua sangre depués de la muerte na cruz. Tenemos, entós, elementos ya cousas qu’arraman simbolismu: la cruz, la copa, la sangre. Somos seres simbólicos: esto yía lo que nos estrema de los outros animales. Ya a la hora de formar los símbolos el nuesu cuerpu yía’l manantial orixinariu: la cara, los güechos, los l.labios. Pero’l símbolu más fuerte del nuesu cuerpu yía la sangre, onde s’axuntan la vida, la muerte ya la fertilidá.

La sangre yía nuesa, porque si la perdemos paez que marcha de nós la esistencia. Al mesmu tiempu, la sangre yía un ser estrañu ya si brota de nós vémosla como un alarmante principiu internu del que nun sabíamos nada. Outramiente, la sangre yía especialmente misteriosa, porque siendo cousa nuesa nun yía nuesa: yía un l.líquidu común a los humanos. Yía un misteriu que la sangre envuelta na nuesa piel seya, tamién, la sustancia que compartimos con xente malvada, con aquel.los que buscan la muerte.