L'escritor que dixo non

L’escritor Elias Canetti naciera un día 25 del mes de Santa Marina en Bulgaria, nuna familia sefardí. Las suas primeras palabras fueran xudeoespañolas: en realidá ‘Canetti’ paez ser una deformación del orixinariu ‘Cañete’, cousa qu’atestiga’l sou aniciu hispánicu. Yá de mui nuevu vivera esti escritor na ciudá de Viena ya xuníuse asina a la l.literatura en l.lingua alemana. Canetti fuera unu de los grandes autores que zarranon el ciclu de la brillante tradición de las l.letras alemanas de los sieglos XIX ya XX. Nas suas páxinas sobre Kafka, por exemplu, veise cómo fuera quien a entender la problemática l.literaria, pero tamién la crisis social del mundu européu en xeneral ya centroeuropéu en particular.

Ayere sábadu cumpliénonse 115 anos del nacimientu d’esti escritor. Son muitas las suas obras valoratibles, anque a mi la que más me prestóu yía la titulada en castel.lanu «Auto de fe», xenial descripción de los requeixos del alma humana ya, especialmente, de la sua parte más fosca ya ruina. Hai agora muita espectación asperando que s’espublicen, en 2024, los sous «Diarios», que nun hai dulda de que serán acedos ya iconoclastas por demás, porque Canetti nun perdonaba.

Puei definise a Canetti de muitas maneras, pero una bien axeitada yía velu como dalguién que siempres quixo negar el poder de la muerte. Escribíu muitu sobre esta cuestión ya tenía la intención de faere un l.libru. Yía verdá qu’enxamás lu terminóu, pero dexóunos una riestra d’aforismos guapísimos ya mui interesantes. Tien méritu enfrentase a la muerte, porque lo que tradicionalmente yera una cousa natural veise agora como un tema que nun convién nin mentar. La nuesa cultura de güei busca esconder esti acontecimientu humanu, un tema incómodu ya difícil de compartir. Escuéndese lo que da pánicu.

Va unos anos contóume un viechu, espontáneamente, cómo vía él la muerte. Espresábase asina: «La muerte yía como una fana mui prieta», o seya, un precipiciu mui negru. Sorprendíume esti comentariu ya alcordéime de la figura d’Elias Canetti, un militante anti-muerte. Canetti nun se consuela con outra vida. Canetti desprecia a los que se someten a la muerte aceutándola o fayendo un pautu con el.la. Repudia a los que, de rodiel.las, ven la muerte como una cousa lóxica. Él protesta, él diz non. Él nun s’engaña a sí mesmu: «la muerte chega d’una manera mui fácil, tenía que sere más difícil». Non al disimulu, non a la cobardía. Enxamás fixo’l cuentu a la muerte, enxamás quixo entendela nin aceutóu’l chantaxe de lo inevitable. «Naide puei dicire que baxéi la cabeza delantre de la muerte, la muerte yía perversa».