Salentinos ya la hipótesis de Menéndez Pidal

S alentinos yía un pueblo mui guapu puestu nun val.le con vexetación abonda. El val.le fuera un glacial ya non l.luenxe d’él alcuéntrase’l viechu monte Catoute, na grandona Sierra de Xistréu, que tien un nome que vien de la «xistra» (‘meum athamanticum’), una planta con poderes curativos, propia de la zona ya bien abundante no propiu territoriu de Salentinos.

Salentinos alcuéntrase cerca d’outru pueblu, tamién guapu por demás, chamáu Salientes ya entrambos pertenecían al concechu de Palacios del Sil, anque va unos anos Salentinos independizóuse ya agora pertenez a Páramu.

Hai muitas cousas polas que yía interesante Salentinos: el sou silenciu propiu d’un val.le tranquilu, el sou ríu al pía de las casas, la sua naturaleza chena de vitalidá cuando pola primavera estal.la la vida... Pero tamién yía bien interesante pola sua l.lingua, que yía la nuesa l.lingua, onde s’alcuentra un fonema, un soníu mui carauterísticu, asemecháu a la «che», pero que nun yía la «che». Científicamente diríamos que yía una consonante ‘africada, retroflexa, xorda’, pero esta yía una fórmula demasiáu complicada ya por esu mesmu conozse popularmente como «che vaqueira», nome que nun yía esautu, porque esta «che» especial dase en zonas non vaqueiras, como Salentinos, que nun yía una población de vaqueiros.

Esta chamada «che vaqueira» yía una consonante muitu estudiada polos filólogos, porque yía un casu esceicional en tola península ibérica ya hasta n’Europa. Los filólogos fixenon muitas hipótesis pa esplicar esta consonante, que tuvo muitas formas d’escribise (ts, tch, chx, l.l), pero de tolas hipótesis destaca la de Menéndez Pidal. Esti estudiosu afitóuse nel nome del pueblu, Salentinos, pa suponer que l’aniciu de la chamada «che vaqueira» vien del Sur d’Italia, onde hai una consonante que se paez muitu, ya que la traxeran los romanos del sur (de la parte del «tacón» que yía la «bota italiana») cuando vinieran al occidente d’Asturias ya noroeste de León en tiempos del Imperiu Romanu. «En los montes por donde se extiende el área ‘ts’ hay un lugar llamado Salentinos (ayuntamiento de Palacios del Sil)» escribía Menéndez Pidal en 1960. Según el l.lingüista, esa ‘ts’ tuvo que venire d’Italia ya aseguraba en 1954: «El pueblo de los Salentini, en el extremo meridional de la Apulia, parece recordado en Salentinos, al norte de León».

Güei hai muitas duldas en cuantas a la hipótesis de Menéndez Pidal ya búscanse outros oríxenes pal nome de Salentinos. Pero esta guapa población, seya cual seya’l futuru, quedará pa siempres puesta nun sitiu importante na hestoria l.lingüística del mundu hispánicu.