Ecos de la hestoria d’Edipo

C hamóume l’atención l.leere nos testos del gran Julio Camarena un cuentu que pañara en Teixeira (Tejeira), un pueblu guapísimu del Bierzu. El mesmu autor escribe que lu pañóu cuantayá, no mes d’agostu de 1985, ya que lu escuitara a un informante de 66 anos. El cuentu titúlase «La visión» ya yía la hestoria d’una familia que nun tenía fichos ya asina l’home ya la mucher caneaban, suspiraban por tenelos. Pero al final tuvieran un fichu que, mientras un día andaba de caza, quedóu adormiláu ya tuvo una visión que dixo:

—Matarás un día a tous padres, anque los quieras muitu.

Entós el rapaz quixo marchar pa que la visión nun se cumpliera ya despidíuse de sous padres, que quedanon chorando, ya marchóu por ail.lí alantrones, pal estranxeiru, pa que nun se cumpliera aquel.la anuncia. Chegóu a un sitiu mui l.luenxe ya casóuse ya fíxose bien ricu ya nun supo nada de los padres. Pero estos, cuando pasóu’l tiempu, marchanon mundu alantre pa buscalu ya terminanon alcontrándolu. Cheganon a la casa del fichu, qu’andaba de caza, pero la sua nuera dixo que s’acostaran na sua cama, porque víalos cansos por demás. La nuera marchóu pa la ilesia a misa ya cuando volvíu’l fichu alcontróu na cama de matrimoniu a dous cuerpos tapaos: creyíu que la sua mucher yera infiel ya cono cuchiel.lu matóu a aquel.las duas personas. Pero al salir de casa alcontróu a la sua mucher, que contóu que vinieran a velu los sous padres. Ya entós él díuse cuenta de que se cumpliera lo que dixera la visión.

Camarenta alcontróu nesta hestoria la mesma raíz que la de la famosa hestoria d’Edipo na Grecia clásica. Cuando Edipo quixo sabere’l sou destín ya foi al oráculu de Delfos, la pitonisa díxo:

—Matarás a tou padre ya casaráste con tua madre. Agora marcha, ¡nun nos contamines!

Edipo afuxíu de casa porque quería escapar de la predicción de los dioses. Nós vivimos nuna tradición cristiana onde eleximos el destín ya somos responsables d’él, pero naquel.la civilización griega naide escapaba del destín ya Edipo tampoucu, porque un día tuvo una engarradiel.la con un home al que nun conocía ya matóulu. Yera sou padre.

Cuando you visitéi aquel val.le onde s’alcuentra l’oráculu de Delfos, las piedras del templu ya del teatru faían revivire un mundu telúricu onde, cerca del monte Parnaso, revivía tola esencia d’aquel.la intensa cultura: aveirábanse los testos clásicos, pero tamién m’alcordéi d’aquel humilde cuentu tituláu «La visión». Yía probable que’l núcleu, la esencia de la hestoria seya un esquema incrustáu no que dalgunos chamanon l’inconsciente coleutivu ya qu’apaez en distintas culturas con outras formas.