La brimba que yía un rayu de sol

L os salgueirales, onde crecen los salgueiros, tienen un aquel especial. Alcuéntranse na ouriel.la de los ríos ya tienen alredor piedras redondas que l’augua de los sieglos fuera gastando. Nos salgueirales podemos acariciare las brimbas, sonces pero resistentes, mientras d’algún páxaru, como la l.lavandera, va sutrumiéndose nerviosa ya puesta nun morrillu que cuasi cubre’l ríu.

Onde hai salgueiros yía fácil pensar ya dialogar con unu mesmu. Igual qu’en cuantas al tiempo hai un momentu de la tarde nel que la naturaleza quier dicinos dalgo, asina mesmu, en cuantas al espaciu, los salgueirales saben contare hestorias de nós ya del mundu qu’anda alredor de nós. Siéntese cerca’l marmul.lu del ríu ya entós las brimbas son amigos nuevos venciéndose al nuesu pasu. Esta esperiencia sentíla you n’outros sitios, n’outros ríos, como al l.lau del Ness cuando s’aveira a Inverness. Pero pa prestosos salgueirales nun hai mechor espaciu que la parte alta del ríu Sil.

Pa cestos más sofisticaos había que dir a mercalos a casa d’un artesanu especializáu, a onde vivía un cesteiru. Pero la casa necesitaba tamién cestos simples pal trabachu diariu. Alcuérdome perfeutamente d’aquel.las mañanas nas que diba cono mieu harmanu a las ouriel.las del Sil, cuando entamábamos el l.labor de faere cestos pa casa. Los outros harmanos nun sabíamos escochere bien la clas de brimba (blima, bima, blimba ya outros nomes hai en l.laos distintos) más valoratible pa faere’l cestu, nin conocíamos l’arte d’entretexelas ya entrel.lazalas pa dar formar al cestu o a la cesta, más ancha que’l cestu. La xente viecha del pueblu sabía faelos muitu bien con formas distintas, pero l’arte va perdiéndose.

Marchábamos de la ouriel.la del ríu ya l.levábamos las brimbas escochidas al corral de casa, onde’l primer l.labor yera faere la base entrel.lazada del cestu. Nun seréi a olvidar enxamás l’alcordanza de vere al mieu harmanu sentáu ya, sobre tou, entovía güei yía pa mi un milagru, una imaxe fantástica la que guardo na memoria: una trama central ya tupa de brimbas que de la que salían, como un sol divinizáu conos sous rayos simétricos, las brimbas entovía salvaxes, non dominadas. Esta imaxe vuelve a mi muitos anos más tarde.

Quitáramos las brimbas del sou l.lugare natural, al pía del ríu ya del sou marmul.lu, pero nun quedaban muertas, sinón radiantes, como radios d’una gran rueda, como rayos d’un sol que chegaba a casa pa siguir dando l.luz a los trabachos de la familia. No prósimu l.libru «Entre manos» de Puri Lozano ya Miguel Sánchez veremos cómo bril.la la brimba radiante ya tamién outras sustancias populares.